Meta საკუთარ პლატფორმებზე TikTok-ის რეკლამებს კრძალავს

ბლუმბერგის ცნობით, სოციალური მედიის მსხვილ ოპერატორებს შორის მეტოქეობის გამწვავების ფონზე, Meta-მ აშშ-სა და კიდევ რამდენიმე ქვეყანაში TikTok-ის ჩინური მფლობელი კომპანიის, ByteDance-ის, რეკლამები აკრძალა. აკრძალვა ხუთშაბათს ამოქმედდა. ის ByteDance-ის რეკლამებსა და ფასიან მარკეტინგულ გზავნილებს ზღუდავს. შეზღუდვა ასევე შეეხება მესამე მხარის რეკლამებს, რომლებსაც TikTok-ზე გადასასვლელი ბმული ახლავს.

Meta-ს პრესსპიკერმა კრისტოფერ სგრომ ვერჯისთვის მიცემულ განცხადებაში თქვა: „არ ვართ ვალდებული, გავუშვათ კონკურენტის რეკლამები, რომლის მიზანიც ხალხის ჩვენი აპებიდან გადაყვანაა. კონკურენტისთვის სარეკლამო მომსახურებაზე უარის თქმა სხვადასხვა დარგში ჩვეულებრივი ბიზნესპრაქტიკაა. პროდუქტის ხარისხითა და მომხმარებლის გამოცდილებით კონკურენციას გავაგრძელებთ“.

ეს გადაწყვეტილება Meta-ს მიერ ბავშვთა უსაფრთხოებასთან დაკავშირებულ მასშტაბურ შეთანხმებაზე დათანხმებიდან რამდენიმე თვეში მიიღეს. შეთანხმების თანახმად, კომპანიამ 17 მილიარდი დოლარი უნდა გადაიხადოს და მოზარდებისთვის ახალი შეზღუდვები დაამატოს. ამის შემდეგ Meta-მ TikTok-სა და YouTube-ს მსგავსი დამცავი ზომების დაწესებისკენ მოუწოდა. კომპანიამ ამისთვის სარეკლამო კამპანიაც წამოიწყო, რომლის გავრცელებაზეც TikTok-მა საკუთარ პლატფორმაზე უარი თქვა. მხარდაჭერის გვერდის თანახმად, TikTok-მა მომხმარებლებს ასევე აუკრძალა ბმულების დამატება, რომლებიც „სხვა სოციალური მედიის აპებს ხსნის ან მათში შესვლის საშუალებას გაძლევთ“.

მიუხედავად იმისა, რომ აშშ-ში TikTok-ს ახლა ერთობლივი საწარმო აკონტროლებს, რომლის საკონტროლო წილსაც აშშ-ში დაფუძნებული კომპანიები ფლობენ, ByteDance კვლავ მსხვილი აქციონერია. ახალი პოლიტიკა TikTok-ის რეკლამებს აშშ-ის გარდა კანადაში, ეგვიპტეში, ინდონეზიაში, იაპონიაში, ტაილანდსა და ვიეტნამშიც შეზღუდავს.