Microsoft 365-ის შეფერხებამ გერმანიის სასტუმროში 15 სტუმარი ქლორის გაზით მოწამლა

გერმანიის ერთ-ერთ სასტუმროში 15 სტუმარი ქლორის გაზით მოიწამლა, რაც Microsoft-ის ღრუბლოვანი სერვისების ბოლო შეფერხებამ გამოიწვია. სასტუმროს საუნის ზონაში უსაფრთხოების სისტემა იყო დამონტაჟებული, რომელიც ტექნიკური მომსახურებისას ქლორის შემცველობას აკონტროლებდა. თუ დონე ზედმეტად მაღალი გახდებოდა, სისტემა ოპერატორებს ელექტრონულ წერილებს უგზავნიდა გასაფრთხილებლად. თუმცა სერვისის შეფერხების გამო შეტყობინებები ვერ გაიგზავნა და ქლორის დონემ მოიმატა, რასაც ადამიანების დაშავება მოჰყვა, წერს Notebookcheck. შემთხვევის ადგილზე გერმანიის საგანგებო სამსახურებმა 40 მაშველი გაგზავნეს. ადგილობრივი მედიის ცნობით, ოთხი დაზარალებული სამკურნალოდ საავადმყოფოში გადაიყვანეს, ერთი კი დამატებითი მეთვალყურეობისთვის იქ დატოვეს.

ტექნოლოგიურმა გიგანტმა 12-14 ნოემბერს გლობალური შეფერხება განიცადა, რომელმაც Outlook-სა და სხვა სერვისებსაც შეუქმნა პრობლემა. ამის გამო ზოგიერთმა იაპონელმა თანამშრომელმა სამუშაოს გასაგრძელებლად ფაქსის აპარატები გამოიყენა. შეფერხება 2024 წელს CrowdStrike-ის ჩავარდნაზე მასშტაბური არ ყოფილა. მაშინ კორპორაციული კომპიუტერული სისტემების დიდი ნაწილი შეფერხდა და ამას მსოფლიო მასშტაბით მოჰყვა გამოხმაურება. თუმცა ამ შემთხვევამ ადამიანები დააზიანა და შეიძლებოდა გაცილებით კატასტროფული შედეგებიც მოჰყოლოდა, საკითხი დროულად რომ არ აღმოეჩინათ.

ეს ერთ-ერთი საკითხია, რომელიც დაწესებულებებმა ონლაინსერვისების ან ნივთების ინტერნეტის გამოყენებით სისტემების ავტომატიზაციისას უნდა გაითვალისწინონ, განსაკუთრებით მაშინ, თუ სისტემები უსაფრთხოებისთვის მნიშვნელოვანია. ასეთი სისტემების შემქმნელებმა ყოველთვის უნდა გაითვალისწინონ ფიზიკური ან ანალოგური სარეზერვო საშუალება, რომელიც მუშაობას გააგრძელებს მაშინაც, თუ ყველაფერი გაითიშება. რაც უფრო მნიშვნელოვანია, თანამშრომლებმა უნდა იცოდნენ, რომ ასეთი საშუალება არსებობს და უნდა ესმოდეთ, როგორ მუშაობს.

კიდევ ერთი შესაძლებლობაა, ბიზნესმა საკუთარი სერვერები განათავსოს, ავტომატიზაციის სისტემები თავად შექმნას და ყველაფერი ადგილობრივად მართოს. თუმცა ამისთვის მთელი სისტემის შექმნასა და პროგრამირებაში მეტი ჩართულობა იქნება საჭირო. პრობლემას შეიძლება ადგილობრივი ინფრასტრუქტურაც ქმნიდეს, მაგალითად, ელექტროენერგიის გათიშვა.

Microsoft-ის შეფერხება ასევე ცხადყოფს, რომ კორპორაციული სამყარო სულ უფრო მეტად არის დამოკიდებული რამდენიმე დიდ ტექნოლოგიურ კომპანიაზე. Microsoft-ის, Google-ისა და AWS-ის მსგავს გიგანტებს მასშტაბის ეკონომია ხელს უწყობს, სერვისები მცირე კონკურენტებთან ან შიდა სისტემებთან შედარებით უფრო საიმედოდ და იაფად შესთავაზონ მომხმარებლებს. თუმცა ეს იმასაც ნიშნავს, რომ მათი გათიშვის შემთხვევაში ზარალდება მათზე დამოკიდებული მილიონობით ბიზნესი და ეკონომიკური საქმიანობა ჩერდება.