NASA-მ ახალი ექსპერიმენტული თვითმფრინავი X-70 Fractal წარადგინა

NASA-მ ახალი ექსპერიმენტული საფრენი აპარატი, X-70 Fractal, წარადგინა, თუმცა მისი ბევრი მახასიათებელი კვლავ უცნობია. სააგენტოს ცნობით, ის კვლევითი პლატფორმაა, რომელიც მოწინავე საავიაციო გამოცდებისთვის შეიქმნა. ჯერჯერობით NASA-მ მხოლოდ კომპიუტერული გამოსახულებები და აპარატის შესაძლებლობების შესახებ რამდენიმე ტექნიკური მონაცემი გამოაქვეყნა.

საიდუმლოებრიობის მიუხედავად, ახალი აპარატის შესახებ გარკვეული წარმოდგენის შექმნა შესაძლებელია. უპირველესად, ის კოსმოსური ხომალდი არ არის, ანუ დედამიწის ორბიტაზე გასასვლელად ან ატმოსფეროს გარეთ სამუშაოდ არ შეუქმნიათ. ეკიპაჟიანი, ქვეხმოვანი თვითმფრინავი კომერციულ თვითმფრინავებზე ბევრად მაღლა დაფრინავს და 45 000 ფუტზე მეტ სიმაღლეს აღწევს, სტრატოსფეროს სიღრმეში. გამოქვეყნებული სხვა მონაცემებით, მისი მაქსიმალური სიჩქარე 0,75 მახია, დაახლოებით 575 მილი საათში. ერთი ფრენით მას თითქმის 1 700 მილის გავლაც შეუძლია.

NASA-ს ცნობით, X-70 Fractal შესაძლებელს გახდის იმ მანევრების კვლევას, რომლებიც ეკიპაჟიან თვითმფრინავებზე აქამდე არ გამოუცდიათ. სააგენტოს არ დაუკონკრეტებია, რა ტიპის მანევრებს გეგმავს. თვითმფრინავს ერთი ტონამდე ექსპერიმენტული აღჭურვილობის გადატანაც შეეძლება. NASA-ს ეგიდით მისი პირველი ფრენა მომდევნო ორი წლის განმავლობაში იგეგმება.

აპარატის ერთ-ერთი მთავარი მახასიათებელი მოდულური კონსტრუქცია იქნება. ეს ექსპერიმენტული აღჭურვილობის თვითმფრინავის შიგნით და გარეთ სწრაფად დამონტაჟებისა და შეცვლის საშუალებას იძლევა. სწორედ ამიტომ უწოდებენ მას „ექსპერიმენტულ პლატფორმას“. მას ასევე ექნება ფრენის მართვის ხელახლა გადასაწყობი სისტემები. მათი საშუალებით NASA თვითმფრინავის მართვის სხვადასხვა ხერხს შეისწავლის და თითოეული კვლევითი პროექტისთვის ცალკე პლატფორმის შექმნა აღარ დასჭირდება.

NASA ყველაზე მეტად კოსმოსური მისიებითაა ცნობილი, თუმცა სააგენტო დიდი ხანია საავიაციო კვლევებითაც არის დაკავებული. სწორედ ამას აღნიშნავს მის სახელწოდებაში პირველი ასო A. სააგენტოს სათავეები აერონავტიკის ეროვნული საკონსულტაციო კომიტეტის შექმნას უკავშირდება. კომიტეტი 1915 წელს დაარსდა და 1958 წელს ახლად შექმნილ NASA-ს შეუერთდა.

ამის შემდეგ კოსმოსურმა სააგენტომ მრავალი ექსპერიმენტული თვითმფრინავი შექმნა. მათზე გამოსცადეს ზებგერითი ფრენა, ძრავების სისტემები და ახალი აეროდინამიკური კონფიგურაციები. ყველა პროტოტიპი მოქმედ თვითმფრინავად არ ქცეულა, თუმცა მიღებული ცოდნა მომავალი სამოქალაქო და სამხედრო თვითმფრინავების, ასევე კოსმოსური ხომალდების შექმნას უწყობს ხელს.

სააგენტოს უახლეს პროექტებს შორისაა X-59, რომელიც კოსმოსურ-საავიაციო და თავდაცვის კომპანია Lockheed Martin-თან თანამშრომლობით შეიქმნა. მისი მიზანია ზებგერითი თვითმფრინავების მიერ წარმოქმნილი ხმაურის შემცირების გზების კვლევა. X-70 Fractal ცაში ახალი ტექნოლოგიების გამოცდის ამ ტრადიციას შეუერთდება.