New York Times: პენტაგონი ირანზე თავდასხმის ახალ გეგმებს ამზადებს

New York Times-ი წყაროებზე დაყრდნობით იტყობინება, რომ სამდღიანი დარტყმების კამპანიის რამდენიმე ვარიანტი მომზადდა. დონალდ ტრამპმა ბოლო საათებში უარყო, რომ შუალედურ არჩევნებამდე ირანზე თავდასხმა მოხდება.

ისლამური რევოლუციის გვარდიის კორპუსის საზღვაო ძალების მეთაურის მოადგილემ პოლიტიკურ საკითხებში, ალი მოჰამადიმ, ირანულ სააგენტო Fars-ს განუცხადა, რომ ირანის ძალები ჰორმუზის სრუტეში ყოველ ღამე ოპერაციებს ატარებენ. მისი თქმით, ისინი მოქმედებენ გემების წინააღმდეგ, რომლებიც, თეირანის შეფასებით, მის წესებს არღვევენ. Al Jazeera-ს ცნობით, მოჰამადიმ განაცხადა, რომ გვარდიის საზღვაო ძალები კონფლიქტის პირველი დღიდან სრუტეზე „სრულ და აბსოლუტურ“ მეთვალყურეობას ინარჩუნებენ. მან დასძინა, რომ ისინი როგორც თავდასხმით, ისე თავდაცვით ოპერაციებს გააგრძელებენ. მოჰამადიმ ასევე უარყო აშშ-ის პრეზიდენტ დონალდ ტრამპისა და მედიის მიერ დასახელებული მონაცემები ჰორმუზის სრუტეში გამავალი ნავთობის მოცულობის შესახებ. მან სამიდან რვა მილიონ ბარელამდე შეფასებებს „მცდარი“ უწოდა. მოჰამადის თქმით, ეს მონაცემები „მედიის სპეკულაციაა“, რომლის მიზანი ნავთობის ფასების შემცირება და ბაზარზე გავლენის მოხდენაა. მან დასძინა, რომ გვარდიის საზღვაო ძალებს შეუძლიათ, ჰორმუზის სრუტის „ნებისმიერ წერტილში“ საკუთარი ნება მოახვიონ გემებს, რომლებიც წესებს არ ასრულებენ. ამასთან, მან აშშ სპარსეთის ყურესა და უფრო ფართო რეგიონში არასტაბილურობის შექმნაში დაადანაშაულა.