Nvidia-მ 150 მილიარდი დოლარის აქციების გამოსყიდვა დაამტკიცა

განცხადება Nvidia-ს მოგების უწყვეტი ზრდის ფონზე გამოქვეყნდა. ტექნოლოგიური ინდუსტრია ხელოვნური ინტელექტის ინფრასტრუქტურაში კვლავ უზარმაზარ თანხებს დებს. ეს ღრუბლოვანი მომსახურების უმსხვილესი მომწოდებლების მოთხოვნას ხელოვნური ინტელექტის ამაჩქარებლებზე მაღალ დონეზე ინარჩუნებს. ახალი მონაცემთა ცენტრები, რომლებიც ყველგან შენდება, დიდი რაოდენობით ამაჩქარებლებს, პროცესორებსა და მეხსიერების მოწყობილობებს საჭიროებს. ეს Nvidia-სთვის ხელსაყრელია. კომპანიის ჩიპები ასევე დიდი ენობრივი მოდელების ძირითადი ნაწილია, რომლებსაც ChatGPT, Claude და Gemini ეფუძნება.

Nvidia-ს აღმასრულებელმა დირექტორმა ჯენსენ ჰუანგმა ორშაბათის პრესრელიზში განაცხადა: „Nvidia-ს ზრდას ხელოვნურ ინტელექტსა და დაჩქარებულ გამოთვლებზე გადასვლა განაპირობებს, რაც ერთ თაობაში ერთხელ ხდება. ფულადი სახსრების გამომუშავების უნარი საშუალებას გვაძლევს, ამ ცვლილების მამოძრავებელ ტექნოლოგიებში ინვესტიციაც ჩავდოთ და კაპიტალიც აქციონერებს დავუბრუნოთ. აქციების გამოსყიდვის ეს ნებართვა გრძელვადიანი შესაძლებლობებისადმი ჩვენს რწმენას ასახავს“.

გაზეთ ფაინენშალ ტაიმსის (Financial Times) ცნობით, აქციების ფართომასშტაბიანი გამოსყიდვის ნებართვა ხშირად მიუთითებს, რომ კომპანიის ხელმძღვანელობა მის აქციებს სათანადოდ დაუფასებლად მიიჩნევს. გამოცემა დასძენს, რომ მსხვილ, დამკვიდრებულ კომპანიებში კაპიტალის დიდი მოცულობით დაბრუნებას, როგორც წესი, ზრდის შენელება ახლავს.

აპრილის ბოლოს Nvidia პირველი კომპანია გახდა, რომლის საბაზრო კაპიტალიზაციამ ხუთ ტრილიონ დოლარს მიაღწია. ის მსოფლიოში ყველაზე ძვირად ღირებულ კომპანიად მიიჩნევა. ბოლო წლებში კომპანიის აქციების ფასი სწრაფად გაიზარდა. ფაინენშალ ტაიმსის ცნობით, 2022 წლის ბოლოდან ფასი 13-ჯერ გაიზარდა. თუმცა, წლის დასაწყისიდან ეს ტემპი ოდნავ შენელდა და აქციების ღირებულება მას შემდეგ „მხოლოდ“ 20%-ზე ოდნავ მეტით გაიზარდა.