OpenAI-მ ChatGPT Wallet წარადგინა, მისი აგენტები მომხმარებლებისთვის შეიძენენ ნივთებს

OpenAI-მ პარასკევს ChatGPT Wallet წარადგინა, გადახდის ახალი ფუნქცია, რომელიც მის ხელოვნური ინტელექტის აგენტებს, სახელად „დოტებს“, მომხმარებლების სახელით ნივთების შეძენის შესაძლებლობას აძლევს.

კომპანიამ ChatGPT Wallet American Express-თან, Mastercard-თან და Visa-სთან პარტნიორობით შექმნა. ის ბარათის მფლობელებს არსებული საკრედიტო ბარათის ჯილდოებისა და დაცვის მექანიზმების შენარჩუნების საშუალებას აძლევს. შესაბამისი მომხმარებლები ბარათის მონაცემებს ერთხელ შეიყვანენ, აგენტს სთხოვენ, საყიდელი ნივთები მოძებნოს და თითოეულ შესყიდვას უსაფრთხოების შემოწმებით ადასტურებენ.

OpenAI-ის განცხადებით, მისი აგენტები „დოტები“ მომხმარებლის ბარათის მონაცემებს ვერასოდეს მიიღებენ. ამის ნაცვლად, გადახდის ქსელები აგენტს „გადახდის ტოკენს“ მიაწვდიან. ის შეიცავს ბარათის შეზღუდული გამოყენების ნომერს, უსაფრთხოების კოდსა და ვადის გასვლის თარიღს, რომელიც კონკრეტული ტრანზაქციისთვის განკუთვნილია.

OpenAI-ში მონეტიზაციისა და გადახდების პროდუქტის მიმართულების ხელმძღვანელმა ჩაია ნაიაკმა სი-ენ-ბი-სისთან ინტერვიუში განაცხადა: „ჩვენი მიზანია, ყურადღება მოვაჭრეებსა და ჩვენს ქსელურ პარტნიორებზე გავამახვილოთ და შევქმნათ უსაფრთხო და მარტივად გამოსაყენებელი მყარი საფუძველი“.

ChatGPT Wallet იმ დროს გამოჩნდა, როცა სულ უფრო მეტი მომხმარებელი იკვლევს, როგორ გამოიყენოს პირადი ხელოვნური ინტელექტის აგენტები კალენდრის სამართავად, მოგზაურობის დასაჯავშნად და ყოველდღიური სხვა საქმეების შესასრულებლად. OpenAI-მ აგენტები „დოტები“ ყოველწლიურ დეველოპერთა კონფერენციაზე, სექტემბრის ბოლოს წარადგინა. ეს მოხდა მალევე მას შემდეგ, რაც Meta-ს შეთავაზება Muse App Store-ის რეიტინგში პირველ ადგილზე გავიდა.

ChatGPT Wallet-ის მეშვეობით განხორციელებულმა შესყიდვებმა შესაძლოა საბოლოოდ OpenAI-ს შემოსავლის ახალი წყარო გაუხსნას. თუმცა, კომპანიამ განაცხადა, რომ თავდაპირველად ტრანზაქციებიდან წილს არ აიღებს. საწყის ეტაპზე OpenAI მოვაჭრეებთან ურთიერთობებს აყალიბებს და ცდილობს, მყიდველებისთვის სერიოზულ პლატფორმად პოზიციონირდეს, განსაკუთრებით ახლა, როცა გამყიდველები პირად აგენტებზე ექსპერიმენტებს იწყებენ.

გასული წლის განმავლობაში OpenAI უფრო აქტიურად ჩაერთო ხელოვნური ინტელექტის გამოყენებით ვაჭრობაში, თუმცა მისი ზოგიერთი ადრეული მცდელობა წარმატებული არ აღმოჩნდა. გასულ შემოდგომაზე კომპანიამ „Instant Checkout“ ფუნქცია წარადგინა, რომელსაც მალევე ჩამოშორდა. მარტისთვის კი განახლებული სავაჭრო გამოცდილება დანერგა, რომლის მიზანიც მომხმარებლებისთვის პროდუქციის მოძებნისა და შედარების გამარტივება იყო.

ნაიაკის თქმით, ChatGPT Wallet OpenAI-ის წინა მცდელობებს ეფუძნება, განსაკუთრებით კი პროდუქციის აღმოჩენის მიმართულებით.