OpenAI მონაცემთა ცენტრების ენერგომოხმარების შემცირების პროგრამას იწყებს

ელექტროენერგიის მოხმარება ერთ-ერთი მთავარი საკითხია, რომელსაც მოსახლეობა წამოჭრის, როცა მათ თემში მონაცემთა ცენტრის აშენებას გეგმავენ. ამიტომ OpenAI ადგილობრივ ელექტროქსელზე გავლენის შესამცირებლად ზომებს იღებს. კომპანიის ცნობით, პროგრამა „ქსელის დამცველები“ მიზნად ისახავს, რომ ადგილობრივი მოთხოვნის ზრდასთან ერთად მონაცემთა ცენტრებმა ენერგომოხმარება შეამცირონ. ამით პიკურ საათებში ქსელი გადატვირთვას აირიდებს. გარდა იმისა, რომ ყველასთვის ელექტროენერგიის მიწოდება შენარჩუნდება, პროგრამა მონაცემთა ცენტრებს ქსელთან მიერთებისა და მუშაობის უფრო ადრე დაწყების საშუალებასაც მისცემს. მათ დამატებითი ენერგიის წყაროების ამოქმედებას აღარ მოუწევთ ლოდინი.

OpenAI-მ თავის ბლოგში დაწერა: „იქნება ეს ჩრდილოეთში სიცივის დროს სახლების გათბობა თუ სამხრეთში სიცხის ტალღისას კონდიციონერების მუშაობა, ოჯახებს ელექტროენერგიის საიმედო მიწოდება სჭირდებათ. ჩვენი მიზანია, ელექტროქსელთან მოქნილი ურთიერთქმედება რესურსად ვაქციოთ, რომელსაც ენერგოკომპანიები მაშინ გამოიყენებენ, როცა თემებს ეს ყველაზე მეტად დასჭირდებათ“. კომპანიამ დასძინა: „პროგრამა „ქსელის დამცველების“ მეშვეობით გვინდა, ასეთი მოქნილობა მომავალი კამპუსების მშენებლობისა და მუშაობის განუყოფელ ნაწილად ვაქციოთ. ეს ნიშნავს, რომ ობიექტებს საჭიროების შემთხვევაში ელექტროენერგიის მოხმარების შესამცირებლად დავაპროექტებთ და ენერგოკომპანიებთან შევათანხმებთ, რამდენით, რა სისწრაფით და რა ხანგრძლივობით შეიძლება მოთხოვნის შემცირება. პირობები ადგილმდებარეობის მიხედვით განსხვავდება. დამატებით ვალდებულებებს მათი საბოლოოდ შეთანხმების შემდეგ გავასაჯაროებთ“.

OpenAI პროგრამას ჯორჯიის შტატში, ეფინგემის ოლქში დაგეგმილ კამპუსში ცდის. კომპანიის თქმით, მან Georgia Power-თან უკვე გააფორმა 3,2-გიგავატიანი შეთანხმება, რომელიც მოთხოვნის მოქნილად მართვის 1 000 მეგავატს მოიცავს. ეს ნიშნავს, რომ წლის ყველაზე ცხელ დღეებში, როცა მოთხოვნა მკვეთრად გაიზრდება, საკმარისი ელექტროენერგია იქნება ასობით ათასი კონდიციონერის მუშაობისთვის და ჯორჯიის მცხოვრებლებს სიცხისგან დაიცავს. საშუალო ამერიკული სახლი დაახლოებით 1 200 კილოვატს მოიხმარს. ამიტომ 1 000-მეგავატიანი რეზერვი დაახლოებით 800 000 სახლის, ანუ შტატის სახლების თითქმის 20%-ის, მომარაგებისთვის საკმარისზე მეტია.

ამ ტექნოლოგიას, რომელსაც მოთხოვნის მოქნილად მართვას უწოდებენ, რამდენიმე ათეული წელია იყენებენ. მსხვილი ოპერატორები საკუთარ მოხმარებას ამცირებენ, როცა სხვა მომხმარებლების მოთხოვნა პიკს აღწევს. ავტომატიზაციამდე ქსელის ოპერატორები ფოლადის ქარხნების მსგავს სამრეწველო მომხმარებლებს ხელით უკავშირდებოდნენ და მოხმარების შემცირებას სთხოვდნენ, რათა მთელი ქსელის საიმედო მუშაობა უზრუნველეყოთ. თანამედროვე ტექნოლოგიებისა და ნივთების ინტერნეტის წყალობით, ახლა ეს პროცესი ავტომატურად შეიძლება წარიმართოს. მონაცემთა ცენტრებს დატვირთვის შემცირება ერთ წუთზე ნაკლებ დროში შეუძლიათ. Nvidia მსგავს სისტემას გაერთიანებულ სამეფოში უკვე ცდის და მისი ეფექტიანობა დაადასტურა.