ფედერალური სარეზერვო სისტემის გადაწყვეტილებამ ბაზრები შეარყია

სი-ენ-ბი-სი რამდენიმე ინვესტორს ესაუბრა. მათი თქმით, გადაწყვეტილება პორტფელების გადასახედად და ბაზრის არასათანადოდ დაფასებულ ნაწილებში შესაძლებლობების მოსაძებნად ბიძგიცაა.

შემოსავალზე ორიენტირება

Momentum Advisors-ის საინვესტიციო დირექტორი ალან ბუმერი სახაზინო და მუნიციპალურ ობლიგაციებში ახალ შესაძლებლობებს ხედავს. ამავდროულად, საორიენტაციო 10-წლიანი სახაზინო ობლიგაციის შემოსავლიანობამ 5%-ს მიაღწია.

ბუმერმა თქვა: „ჩემი ბევრი კლიენტის პორტფელში აქციების წილი ზედმეტად მაღალია, რადგან მათი ფასი ძალიან გაიზარდა. სახაზინო ობლიგაციებს ვყიდულობ, რადგან ამ დონეებზე კორპორაციული რისკის აღება არ მსურს. ეს ერთ-ერთი ის მომენტია, როცა მოგვიანებით იტყვი, ნეტავ ობლიგაციები მეყიდაო. ეს უფასო ფულს ჰგავს“.

Lighthouse Investment Group-ის წარმომადგენელი ბრაიან ჯოისიც ობლიგაციებში ხედავს შესაძლებლობებს, თუმცა მხოლოდ მოკლე ვადიანობის მქონე ფასიან ქაღალდებში.

ჯოისმა თქვა: „ვფიქრობ, ბევრ ადამიანს აქვს ხანგრძლივი ვადიანობის ობლიგაციები. თუ ისინი განაკვეთების ზრდას განაგრძობენ, ამ ადამიანებს დიდი ზარალი ელით. მოკლე ვადიანობის ობლიგაციებს ვიყიდდი და საშუალო ან ხანგრძლივი ვადიანობის მქონე ყველაფერს მოვიშორებდი“.

ბუმერს ასევე მოსწონს დივიდენდიანი აქციები და საბირჟო საინვესტიციო ფონდები, რომლებიც მდგრადობაზეა ორიენტირებული. ბუმერმა დასძინა: „დაბალი გადახდის კოეფიციენტის მქონე კომპანიებს მოვძებნიდი, რადგან ეს დივიდენდის უსაფრთხოებასა და საიმედოობას ნიშნავს“.

ციკლური სექტორები

UBS-ის მმართველი დირექტორი ჯეისონ კაცი ფიქრობს, რომ ინფლაციაზე ფედერალური სარეზერვო სისტემის ყურადღება ციკლურ სექტორებს დაეხმარება. მისი შეფასებით, ყველაზე მეტად ფინანსური სექტორი ისარგებლებს.

კაცმა თქვა: „მზარდი განაკვეთების პირობებში ყველაზე დიდ სარგებელს მსხვილი ცენტრალური ბანკები მოგიტანთ. ისინი წმინდა საპროცენტო მარჟის ზრდით ყველაზე მეტად სარგებლობენ. მათ ასევე დაეხმარება კაპიტალის ბაზრის აქტივობა და ამ გარემოში მოქმედი მრავალი სხვა ფაქტორი“.

კაცის თქმით, განაკვეთის ზრდა და კიდევ ერთი შესაძლო მატება გრძელვადიან პერიოდში ფინანსურ სექტორსა და მთლიან ბაზარს დაეხმარება. მან თქვა: „ერთი ან ორი ზრდა სანდოობაზე მიუთითებს, ორზე მეტი კი მას შეასუსტებს. ვფიქრობ, ეს ბევრ კომპანიას წაახალისებს, რომლებიც ვალის მოზიდვას ან შერწყმისა და შეძენის გარიგებებს განიხილავდნენ“.

განსაკუთრებით დიდი ქონების მქონე ინვესტორები

Long Angle-ის დამფუძნებელი ტედ ფელოუზი ამბობს, რომ ჯგუფის წევრები ყველაზე ოპტიმისტურად დიდი კაპიტალიზაციის მქონე კომპანიების აქციებს აფასებენ. Long Angle აერთიანებს ინვესტორებს, რომელთა პორტფელების ღირებულება 5 მილიონიდან 100 მილიონ დოლარამდეა.