ფოლკსვაგენი 2030 წლამდე კიდევ 12 000 სამუშაო ადგილს შეამცირებს

ფოლკსვაგენის (Volkswagen) სააქციო საზოგადოება 2030 წლამდე კიდევ 12 000 სამუშაო ადგილის შემცირებას გეგმავს. ავტომწარმოებელმა ამის შესახებ ჰანოვერში თანამშრომლებთან შეხვედრის შემდეგ განაცხადა.

ფოლკსვაგენის სააქციო საზოგადოება ძირითად ბრენდთან ერთად კომპონენტების განყოფილებასა და ჯგუფის შტაბ-ბინის პოზიციებსაც მოიცავს. ორი წლის წინ უკვე შეთანხმდნენ, რომ 2030 წლამდე 35 000-ზე მეტ სამუშაო ადგილს შეამცირებდნენ. ფოლკსვაგენის ცნობით, ახალი გეგმები დამატებით 12 000 სამუშაო ადგილის შემცირებას გულისხმობს.

ასევე ცნობილია, რომ ფოლკსვაგენის ხელმძღვანელის, ოლივერ ბლუმეს ხელმძღვანელობით, კომპანიის მმართველი საბჭო 2030 წლამდე მსოფლიოში დაახლოებით 50 000 სამუშაო ადგილის გაუქმებას გეგმავს. ეს ჯგუფში აქამდე დაგეგმილი შემცირების გარდა მოხდება.

კომპანიის ცნობით, შემცირება თანამშრომლებისთვის სოციალური ზიანის მინიმუმამდე დაყვანით უნდა განხორციელდეს. ფოლკსვაგენი მოახლოებულ კოლექტიურ მოლაპარაკებებზე დასაქმების გარდამავალი კომპანიების შექმნის საკითხსაც განიხილავს. ეს დროებითი სტრუქტურებია იმ თანამშრომლებისთვის, რომელთა სამუშაო ადგილებიც უქმდება. იქ გადასულებს ახალი სამსახურის პოვნაში დაეხმარებიან, მაგალითად, გადამზადებით. მონაწილეობა, როგორც წესი, სოციალურ გეგმას ან საწარმოს შეთანხმებას ეფუძნება. დასაქმების ფედერალურ სააგენტოს შეუძლია გარდამავალი მოკლევადიანი შემწეობით ხელფასის ნაწილის დაფარვა.

ფოლკსვაგენის ცნობით, გარდამავალი კომპანიების გარდა, საჭიროა ნებაყოფლობითი წასვლის მექანიზმების მაქსიმალურად გამოყენება და შრომითი ხარჯების შემცირება. აქამდე ავტომწარმოებელი ძირითადად ეტაპობრივ პენსიაზე გასვლასა და კომპენსაციებს იყენებდა.

კომპანიის მიზანია, ცვლილებები ისე წარმართოს, რომ თანამშრომლებს არჩევანის შესაძლებლობა და შემდგომი გზისთვის მხარდაჭერა ჰქონდეთ. ჯერჯერობით უცნობია, ფოლკსვაგენის რამდენი თანამშრომელი შეიძლება გადავიდეს გარდამავალ კომპანიაში. ეს ნაბიჯი ნებაყოფლობითი უნდა იყოს.

ასეთი კომპანიების მუშაობის ვადა და ფორმა თანამშრომლებთან მოლაპარაკებით უნდა განისაზღვროს და გაფორმდეს. იგივე ეხება შესაძლო კომპენსაციებსაც. ფოლკსვაგენში კოლექტიური მოლაპარაკებები 24 ნოემბერს დაიწყება.

ფოლკსვაგენის ცნობით, რთული ვითარების მიუხედავად, კომპანია ძალაში ტოვებს სამომავლო კოლექტიურ ხელშეკრულებას და მასში გათვალისწინებულ დასაქმების გარანტიას 2030 წლის ბოლომდე.

ლითონის მრეწველობის პროფკავშირმა IG Metall-მა გარდამავალი კომპანიების შექმნის წინადადება მკაცრად უარყო და მას კოლექტიური მოლაპარაკებების სფეროში სიტყვის გატეხვა უწოდა, რომელსაც მყარი სამართლებრივი საფუძველი არ აქვს. IG Metall-ის რეგიონულმა ხელმძღვანელმა თორსტენ გრიოგერმა განაცხადა: „სანამ გადასახადის გადამხდელები ჩაერთვებიან, ვალდებულება აქციონერებს ეკისრებათ“. დაუშვებელია, რომ ხარჯი საზოგადოებამ გასწიოს, მაშინ როცა აქციონერები დივიდენდების მიღებას განაგრძობენ.