რუსეთი დასავლელ პოლიტიკოსებს კიევში მატარებლით მგზავრობას უფრთხილებს

რუსული დრონი პოლონეთის საზღვართან მატარებელს მოხვდა. მახლობლად მოძრავ სხვა მატარებელში ცნობილი პოლიტიკოსები ისხდნენ. მათ შორის იყვნენ შვედეთის ყოფილი პრემიერ-მინისტრი კარლ ბილტი (Carl Bildt), გაერთიანებული სამეფოს ყოფილი პრემიერ-მინისტრი ბორის ჯონსონი და ფინეთის ყოფილი პრემიერ-მინისტრი სანა მარინი. ორი სპეციალური მატარებლიდან ერთ-ერთში კანცლერ ფრიდრიხ მერცის საგარეო და უსაფრთხოების პოლიტიკის მრჩეველი გიუნტერ ზაუტერიც (Günter Sautter) იმყოფებოდა.

თავდასხმას მსხვერპლი არ მოჰყოლია. თუმცა ის აჩვენებს, რომ რუსეთს ომის უფრო დასავლეთით გადატანა სურს. ეს მარშრუტი უკრაინასა და დასავლეთს შორის მნიშვნელოვანი დამაკავშირებელი გზაა. მას მხოლოდ უკრაინის რიგითი მოქალაქეები არ იყენებენ. კიევში სოლიდარობის გამოსახატავად ამ გზით მრავალი პოლიტიკოსიც ჩადის. ეს მოსკოვმაც იცის.

კრემლის განცხადებით, ყველა მგზავრმა რისკები „ცივი გონებით“ უნდა შეაფასოს.

რუსეთის სახელმწიფო მედიის ცნობით, საგარეო საქმეთა სამინისტროს პრესსპიკერმა მარია ზახაროვამ (Maria Zakharova) განაცხადა, რომ მგზავრების უსაფრთხოებას ვერავინ უზრუნველყოფს. ზახაროვა რუსული პროპაგანდის ერთ-ერთი მთავარი ფიგურაა. მან უკრაინის მთავრობა დაადანაშაულა, რომ ის „VIP-ებს“ სავარაუდო სამხედრო კოლონებისთვის ცოცხალ ფარად იყენებს. ზახაროვას თქმით, კრემლის გაფრთხილება ძალაში რჩება: ეს მარშრუტი, ისევე როგორც უკრაინის ყველა სხვა ტერიტორია, უსაფრთხო არ არის.

უკრაინის აეროპორტები წლებია, დაკეტილია. ამიტომ კანცლერი მერცი და მისი მინისტრებიც პოლონეთიდან უკრაინაში ღამის სპეციალური მატარებლებით მგზავრობდნენ. ბერლინში ორშაბათს განაცხადეს, რომ უსაფრთხოების მდგომარეობის უკეთ შეფასებამდე მაღალი თანამდებობის პოლიტიკოსები უკრაინაში მატარებლით აღარ გაემგზავრებიან.

შაბათ-კვირას სპეციალური მატარებლით იალტის ევროპული სტრატეგიის კონფერენციის (Yalta European Strategy, YES) მრავალი მონაწილე მგზავრობდა. მაღალი რანგის მონაწილეების გამო ყოველწლიურ YES-ის კონფერენციას „უკრაინულ დავოსსაც“ უწოდებენ. უკრაინის სარკინიგზო კომპანიამ „უკრზალიზნიციამ“ (Ukrzaliznytsia) არ გამორიცხა, რომ თავდასხმის სამიზნე მატარებელი ყოფილიყო, რომელსაც მედია YES-ექსპრესს უწოდებს.

ბოლო თვეებში რუსეთი უკრაინაში მოძრავ მატარებლებზე ფაქტობრივად ნადირობდა. საფრთხის მიუხედავად სარკინიგზო მიმოსვლის შესანარჩუნებლად შექმნილია სამეთაურო ცენტრები. იქ თანამშრომლები საჰაერო საფრთხეებს რეალურ დროში აკვირდებიან და აფასებენ.