ჰორმუზის სრუტეში სამი ნავთობმზიდი გაჩერდა

„ფრანს პრესის“ ცნობით, ირანელი ოფიციალური პირები ამტკიცებდნენ, რომ ოთხივე გემი აკრძალულ და სახიფათო ზონებში გადაადგილდებოდა. თუმცა გაურკვეველი დარჩა, პარასკევის განცხადებაში ნახსენები ორი ნავთობმზიდი დამატებითი გემები იყო თუ ხუთშაბათს მომხდარ ინციდენტებში მონაწილე გემებს შორის შედიოდა.

აშშ-ის ცენტრალური სარდლობის მეთაურმა, ადმირალმა ბრედ კუპერმა, კიდევ ერთხელ განაცხადა, რომ ჰორმუზის სრუტის მთავარი საზღვაო მარშრუტები ირანის საზღვაო ნაღმებისგან გაწმენდილი იყო. მან ასევე თქვა, რომ ირანის ფლოტი განადგურდა და რევოლუციური გვარდიის ძალები სრუტეში აღარ მოქმედებდნენ.

კუპერის თქმით, აშშ-ის ძალები რეგიონში რჩებოდნენ, რათა მთავარი საზღვაო მარშრუტები ღია და უსაფრთხო ყოფილიყო. აშშ-ის ცენტრალურმა სარდლობამ ასევე უარყო გვარდიის ხუთშაბათის განცხადება, თითქოს მან ჰორმუზის სრუტის დასავლეთ ნაწილში ამერიკული MQM-170 „აუთლო“ დრონი ხელში ჩაიგდო.

ირანულმა წყაროებმა პარასკევს ასევე გაავრცელეს ინფორმაცია, რომ ჰორმუზის სრუტის აღმოსავლეთ ნაწილში ამერიკული უპილოტო ზედაპირული ხომალდი განადგურდა. გამოქვეყნების დროისთვის აშშ-ის სამხედრო ძალებს ეს ინფორმაცია არც დაედასტურებინათ და არც უარეყოთ.

საზღვაო ინციდენტების გახშირება ვაშინგტონსა და თეირანს შორის კომერციული გემების სტრატეგიულ სრუტეში გადაადგილების მარშრუტებზე მიმდინარე უთანხმოებას ემთხვევა. ირანი გემებისგან ირანის ხელისუფლებასთან მოძრაობის შეთანხმებას და სრუტის ჩრდილოეთ სანაპიროსთან უფრო ახლოს მდებარე მარშრუტების გამოყენებას მოითხოვს. ირანის კონტროლის თავიდან აცილების მსურველი გემები კი სამხრეთ მარშრუტით სარგებლობენ.

ჰორმუზის სრუტეში სამხედრო დაძაბულობის ზრდის პარალელურად, დიპლომატიური ძალისხმევა გრძელდება, რათა აშშ-სა და ირანს შორის ომის ესკალაცია თავიდან აიცილონ.

CBS News-მა მოლაპარაკებებთან დაახლოებულ წყაროზე დაყრდნობით პროგრესის ნიშნებზე დაწერა. წყაროს ცნობით, ირანი კვირის ბოლომდე ყატარის შუამავლების განახლებულ წინადადებას უნდა პასუხობდეს.

დიპლომატიური ინიციატივის მიზანია, თავიდან აიცილოს აშშ-ის მასშტაბური დარტყმების განახლება ირანზე. პრეზიდენტ დონალდ ტრამპს ბოლო კვირებში ეს შესაძლებლობა არაერთხელ უხსენებია.

Axios-ის ცნობით, ყატარის ხელმძღვანელობით მოქმედი შუამავლები საერთო პოზიციის გამონახვას ცდილობდნენ, მათ შორის ირანის ბირთვული ობიექტების შემოწმებისა და სანქციების შემსუბუქების საკითხებზე. თუმცა ოფიციალური მოლაპარაკებების დაწყების პირობებზე უთანხმოება კვლავ რჩებოდა.

Axios-მა ასევე გაავრცელა ინფორმაცია, რომ აშშ და ისრაელი 3 ნოემბრის აშშ-ის შუალედური არჩევნების შემდეგ ირანზე ფართომასშტაბიანი სამხედრო დარტყმების ვარიანტებს განიხილავდნენ.

„ასოშიეიტედ პრესმა“ ხუთშაბათს ორ დიპლომატზე დაყრდნობით დაწერა, რომ ვაშინგტონმა რამდენიმე რეგიონულ მოკავშირეს ირანზე აშშ-ის თავდასხმების განახლებისა და ირანის შესაძლო საპასუხო ქმედებების შესახებ გააფრთხილა. თუმცა ტრამპს საბოლოო გადაწყვეტილება ჯერ არ მიუღია.

ტრამპმა პარასკევს, კანზას-სიტის რადიოსადგურთან საუბრისას, თქვა, რომ ირანთან ომი „მალე“ დასრულდებოდა. მას არ დაუკონკრეტებია, ეს დიპლომატიური შეთანხმებით მოხდებოდა თუ სამხედრო მოქმედებით.

აშშ-ის პრეზიდენტმა კიდევ ერთხელ გაიმეორა, რომ ვაშინგტონს გარანტიები სურს, რომ ირანი ბირთვულ იარაღს ვერასდროს შეიძენს. მისი განცხადებების დროს თეირანსა და ვაშინგტონს შორის ომის დასრულების პირობებზე შეთანხმების მიღწევის მკაფიო ნიშნები ჯერ არ ჩანდა. მასშტაბური სამხედრო დარტყმების განახლების შესაძლებლობაც კვლავ განიხილებოდა.

თემებიადმირალი ბრედ კუპერიAxiosCBS Newsაშშ-ის ცენტრალური სარდლობაგაერთიანებული სამეფოს საზღვაო სავაჭრო ოპერაციების ცენტრიირანის ისლამური რევოლუციის გვარდიის კორპუსიმუსანდამიომანიMQM-170 აუთლოლუიზა 1

გამოქვეყნდა 30 ოქტომბერი, 2026