Ryanair-ის ხელმძღვანელი 2027 წელს ავიაბილეთების 20%-მდე გაძვირებას ელის

Ryanair-ის აღმასრულებელმა დირექტორმა მაიკლ ო’ლირიმ ორშაბათს სი-ენ-ბი-სის განუცხადა, რომ საწვავის ფასებისგან დასაცავი კონტრაქტების ვადის ამოწურვის გამო, მომავალ წელს ევროპაში ავიაბილეთები შესაძლოა „მნიშვნელოვნად“ გაძვირდეს, მაქსიმუმ 20%-ით.

მიმდინარე ფისკალური წლის პირველ ნახევარში დაბალბიუჯეტიანი ავიაკომპანიის მოგება 15%-ით შემცირდა და 2,15 მილიარდი ევრო შეადგინა (2,3 მილიარდი დოლარი). ამავე პერიოდში იმ საავიაციო საწვავის ფასი, რომლის 20%-იც წინასწარ არ იყო დაცული ფასის ზრდისგან, გაორმაგდა.

„2027 წელს გაცილებით მაღალი ნავთობის ფასები გვექნება. ვფიქრობ, ეს ფასები მნიშვნელოვნად გაძვირებული ავიაბილეთების სახით მომხმარებლებს გადაეცემა“, განუცხადა ო’ლირიმ ორშაბათს სი-ენ-ბი-სის წამყვან სტივ სეჯვიკს.

„ახლო აღმოსავლეთში ვითარება ჯერ კიდევ არ მოგვარებულა. დღეს საავიაციო საწვავის ფასი ბარელზე 170 დოლარია. ეს ძალიან მკვეთრი ზრდაა ხარჯებში, რომელსაც მომავალ წელს ყველა შევეჯახებით. ვფიქრობ, მომავალ წელს ევროპაში ავიაბილეთები 10%-ით, შესაძლოა 20%-ითაც გაძვირდება“, დასძინა ო’ლირიმ.

Ryanair-ის განცხადებით, მოკლე მანძილზე ფრენების ბილეთების გაძვირება საწვავზე ხარჯების სავარაუდო 2 მილიარდი ევროთი ზრდას სრულად ვერ დააბალანსებს. ამიტომ კომპანია ხარჯების გადახედვას იწყებს. ეს მოიცავს ეკიპაჟის კვების რაციონის შემცირებას, ხელფასების დროებით გაყინვის შესაძლებლობას და ხელოვნური ინტელექტის გამოყენებას ეფექტიანობის გასაზრდელად.