სემ ალტმანი Samsung-ის ხელმძღვანელებს მონაცემთა ცენტრებისთვის მეტი მეხსიერების მისაღებად შეხვდა

OpenAI-ის აღმასრულებელი დირექტორი სემ ალტმანი სამხრეთ კორეაში Samsung-ის დაახლოებით 50 გავლენიან ხელმძღვანელს შეხვდა, რადგან კომპანია ხელოვნური ინტელექტისა და მეხსიერების შესაძლებლობების გაფართოებას ცდილობს, იტყობინება ბლუმბერგი. ალტმანი სამხრეთ კორეას მას შემდეგ ესტუმრა, რაც ცოტა ხნის წინ მსოფლიოს შეზღუდული მეხსიერების მარაგის განაწილებაზე ისაუბრა. ამ კვირაში, პოდკასტ Chick Pink-თან ინტერვიუში, OpenAI-ის ხელმძღვანელმა თქვა, რომ პერსონალურ კომპიუტერებში დამონტაჟებული DRAM ხშირად სათანადოდ არ გამოიყენება და მას „საკმაოდ ცუდი“ უწოდა. მისი აზრით, მონაცემთა ცენტრებს შეეძლებათ მეხსიერება უფრო ინტენსიურად გამოიყენონ, თუ კომპიუტერულ რესურსებს ხელოვნური ინტელექტის სხვადასხვა ამოცანას გაუზიარებენ. ამ მოსაზრებას ფართო კრიტიკა მოჰყვა, რადგან OpenAI-ის სერვისები, მათ შორის ChatGPT, დიდწილად ცენტრალიზებულ გამოთვლით ინფრასტრუქტურას ეყრდნობა.

შეხვედრა შაბათს, 30 ოქტომბერს, იონინის რესურსების განვითარების ცენტრში გაიმართა. მას Samsung-ის ფინანსური, ელექტრონიკისა და ბიოტექნოლოგიის მიმართულებების ხელმძღვანელები დაესწრნენ. შეხვედრა Samsung Korea-მ დაადასტურა და თქვა, რომ მხარეებმა არსებული ურთიერთობების გაძლიერებაზე იმსჯელეს. საუბარი განსაკუთრებით შეეხო განზრახვის წერილს, რომელსაც კომპანიებმა 20225 წლის ოქტომბერში მოაწერეს ხელი და რომელიც გლობალურ ხელოვნური ინტელექტის ინფრასტრუქტურაში თანამშრომლობას, მათ შორის OpenAI-ის Stargate პროექტისთვის მეხსიერების ნახევარგამტარების მიწოდებას ითვალისწინებს. Samsung-ის განცხადებით, „კომპანიის ხელმძღვანელებმა და აღმასრულებელმა დირექტორმა სემ ალტმანმა ხელოვნური ინტელექტის ტექნოლოგიის განვითარების მიმართულება და მისი შესაძლო გამოყენება, ასევე ახალი ბაზრები და ბიზნესშესაძლებლობები განიხილეს“.

თუმცა, Samsung-მა ყურადღება უფრო ხელოვნური ინტელექტის ტრანსფორმაციასა და მომავალ ბიზნესშესაძლებლობებზე გაამახვილა და მეხსიერების მიწოდების ახალ შეთანხმებაზე არაფერი გამოუცხადებია. გავრცელებული ინფორმაციით, ალტმანმა Samsung-ის ხელოვნური ინტელექტის ცენტრის ხელმძღვანელს Codex Micro Keyboard-იც აჩუქა, მოწყობილობა, რომელიც OpenAI-ის კოდირების აგენტთან გამოსაყენებლადაა შექმნილი. შეხვედრა იმ დროს გაიმართა, როცა ხელოვნური ინტელექტის ცენტრების მოთხოვნა სწრაფად იზრდება. AMD-ის პროგნოზით, DRAM-იდან მიღებული შემოსავალი 2026 წელს 177%-ით გაიზრდება და დაახლოებით 416 მილიარდ დოლარს მიაღწევს. Trendforce-ის შეფასებით, წელს DRAM-ის მიწოდება მოთხოვნას 1%-ით ან 2%-ით ჩამორჩება, ხოლო დისბალანსი 2027 წელს კიდევ უფრო გაუარესდება. Micron-ის ბოლო გაფრთხილების თანახმად, ახალი საწარმოო სიმძლავრეების შექმნას დრო დასჭირდება, ამიტომ დეფიციტი შესაძლოა 2028 წლამდე გაგრძელდეს.

ამჟამად მონაცემთა ცენტრებისთვის მოთხოვნა შეზღუდული მეხსიერების მარაგის გამო კომპიუტერებს, სმარტფონებსა და სხვა ელექტრონულ მოწყობილობებს უწევს კონკურენცია და მოთხოვნის ზრდამ, შესაძლოა, პიკს ჯერ კიდევ არ მიაღწია. მაღალი გამტარუნარიანობის მეხსიერება (HBM), DRAM-ის სპეციალიზებული სახეობა, რომელსაც ხელოვნური ინტელექტის მოწყობილობებში იყენებენ, განსაკუთრებით მნიშვნელოვანი გახდა, რადგან კომპანიები სულ უფრო მძლავრ გამოთვლით სისტემებს ნერგავენ.