ტრამპმა ტექნოლოგიურ კომპანიებს სუსტი AI-წესები მოაწერინა

დოკუმენტს Meta-მ, Google-მა, OpenAI-მ, Anthropic-მა, Nvidia-მ და xAI-მ მოაწერეს ხელი. ის ტრამპის Truth Social-ის ანგარიშზე გამოქვეყნდა.

დოკუმენტი, რომლის ქვესათაურია „ერთობლივი ვალდებულება მოწინავე სისტემებთან დაკავშირებულ პასუხისმგებლობაზე“, შემდეგი განცხადებით იწყება: „თითოეული კომპანია პასუხისმგებელია, რომ საკუთარი ტექნოლოგია უსაფრთხოდ და მომხმარებლებისა და საზოგადოების ნდობის განმტკიცების გზით განავითაროს“.

დოკუმენტში ნათქვამია: „ეს იწყება იმით, რომ თითოეულ კომპანიას, რომელიც მოწინავე მოდელებს წვრთნის და ნერგავს, მყარი შიდა პროცესები და კონტროლის მექანიზმები აქვს. მათი მეშვეობით კომპანია უნდა დარწმუნდეს, რომ ტექნოლოგია განზრახული წესით მოქმედებს, ხოლო ნებისმიერი პრობლემა სწრაფად ვლინდება და გვარდება“.

შემდეგ დოკუმენტი „კონტროლისა და აუდიტის ოთხ დონეს“ აღწერს. თეთრი სახლის მოსაზრებით, ხელმომწერებმა ისინი „სხვა სიფრთხილის ზომებთან ერთად“ უნდა დანერგონ.

კომპანიამ სწავლებისა და დანერგვისას მყარი შიდა კონტროლი უნდა გამოიყენოს. მან მოდელების შესაძლებლობებსა და მიზნებთან შესაბამისობას კიბერუსაფრთხოების, ბიოუსაფრთხოებისა და ქიმიური საფრთხეების მიმართულებით უნდა დააკვირდეს. ასევე უნდა უზრუნველყოს, რომ მოდელებმა ტექნიკური სისტემები გაუთვალისწინებელი გზით არ გატეხონ და მათზე წვდომა არ მოიპოვონ.

კომპანიამ შიდა გუნდს უფლებამოსილება უნდა მიანიჭოს, რათა კონტროლის, მონიტორინგისა და გამოვლენის მექანიზმების გამართულ მუშაობას გაუწიოს ზედამხედველობა და პრობლემების აღმოფხვრა უზრუნველყოს.

კომპანიამ დამოუკიდებელ გარე აუდიტორთან ან შემფასებელთან უნდა ითანამშრომლოს. მან დამოუკიდებლად უნდა შეაფასოს, მუშაობს თუ არა კონტროლის, მონიტორინგისა და გამოვლენის მექანიზმები განზრახული წესით.

კომპანიამ დირექტორთა საბჭოს დამოუკიდებელი კომიტეტი უნდა განსაზღვროს. ის კონტროლის მექანიზმებზე მომუშავე გუნდებს, შიდა და გარე აუდიტორებსა და შემფასებლებს ზედამხედველობას გაუწევს და მათ ანგარიშებს მიიღებს. კომიტეტმა გამოვლენილი პრობლემების აღმოფხვრაც უნდა უზრუნველყოს.

დოკუმენტი არ განმარტავს, რას ნიშნავს „მყარი“ შიდა კონტროლი. ის არც იმას აკონკრეტებს, რამდენად ხშირად უნდა შეამოწმონ გარე აუდიტორებმა ხელმომწერთა სისტემები. დოკუმენტში არც შეფასებების ჩატარების სიხშირეა მითითებული.

თუმცა დოკუმენტში წერია, რომ მონაწილე კომპანიები „რეგულარულად შეიკრიბებიან, რათა სისტემების უსაფრთხოების გასაუმჯობესებლად სტანდარტები და საუკეთესო პრაქტიკა დაადგინონ“.

სხვა სიტყვებით, მათ საკუთარი წესების შემუშავება შეუძლიათ.