უკრაინულმა სამხედრო რობოტმა 19 კილომეტრიანი მომარაგების მისია ავტონომიურად შეასრულა

უკრაინის სამხედრო დანაყოფმა ოთხშაბათს განაცხადა, რომ სახმელეთო რობოტმა 19 კილომეტრიანი მომარაგების მისია წარმატებით შეასრულა. რობოტი მისიის თითქმის მთელი დროის განმავლობაში ნავიგაციისთვის ხელოვნურ ინტელექტს იყენებდა.

უკრაინის ეროვნული გვარდიის მე-2 კორპუსის, იგივე „ხარტიის“ კორპუსის, ლავას უპილოტო სისტემების პოლკმა (Lava Unmanned Systems Regiment) Business Insider-თან გაზიარებულ განცხადებაში ავტონომიური ლოგისტიკური მისიის დასრულების შესახებ დაწერა. პოლკმა მას „საბრძოლო პირობებში პირველი ასეთი შემთხვევა“ უწოდა.

დანაყოფის ცნობით, რობოტმა 20 კილომეტრიანი მარშრუტის 93% დამოუკიდებლად გაიარა, ტვირთი მიიტანა და საწყის წერტილს ავტონომიურად დაუბრუნდა. ოპერატორი მხოლოდ 1,4 კილომეტრის მანძილზე ჩაერია.

გამგზავრებამდე მარშრუტი და რელიეფი სამგანზომილებიანად სხვა სახმელეთო რობოტმა შეადგინა, რომელიც სინათლის გამოვლენისა და მანძილის გაზომვის ტექნოლოგიით, LiDAR-ით იყო აღჭურვილი. მომარაგების რობოტის კამერები დაბრკოლებებს აფიქსირებდა, ხოლო ხელოვნურ ინტელექტზე დაფუძნებული ნავიგაცია რობოტს გზას უჩვენებდა.

ლავას პოლკის სახმელეთო უპილოტო სისტემების ბატალიონის მეთაურმა ანდრიი კოპაჩმა აღნიშნა: „ამ მისიამ აჩვენა, რომ ავტონომიურ სახმელეთო სისტემებს უკვე შეუძლიათ რეალურ საბრძოლო პირობებში მუშაობა“.

კოპაჩმა თქვა: „ყველაზე დიდი ცვლილება ისაა, რომ ოპერატორი უკვე მძღოლი კი არა, დისპეტჩერია. ავტომობილის ყოველ წამს მართვის ნაცვლად, ის მის მოძრაობას აკვირდება და მხოლოდ საჭიროების შემთხვევაში ერევა“.

კოპაჩის თქმით, დანაყოფის შემდეგი მიზნებია, ერთმა ოპერატორმა ერთდროულად რამდენიმე რობოტს გაუწიოს ზედამხედველობა და ავტონომიური მისიები დაჭრილების ევაკუაციაზეც გაავრცელოს. მან დასძინა, რომ ხელოვნური ინტელექტით აღჭურვილი მეტი სახმელეთო რობოტი შეამცირებს დამოკიდებულებას „მუდმივ საკონტროლო კავშირზე“, მაგალითად, Starlink-ზე, სატელიტური ინტერნეტის სერვისზე, რომელსაც უკრაინაში ბოლო დროს სიჩქარის მნიშვნელოვანი შეფერხებები ჰქონდა. ამან ფრონტის ხაზზე მოქმედებაზეც უარყოფითად იმოქმედა.

სახმელეთო რობოტები უკრაინისთვის მნიშვნელოვან იარაღად იქცა. ისინი მომარაგებას, დაჭრილების ევაკუაციასა და თავდასხმის მისიებს ასრულებენ. უკრაინის სამხედროები და დასავლელი სამხედრო ხელმძღვანელები, რომლებიც ომის გამოცდილებას სწავლობენ, იმედოვნებენ, რომ სახმელეთო რობოტებისა და საჰაერო დრონების უფრო ფართოდ გამოყენება და ამ სისტემებში ხელოვნური ინტელექტის შესაძლებლობების მეტად ინტეგრირება შეამცირებს იმ ჯარისკაცების რისკებს, რომლებიც ამ მისიებს სულ უფრო სახიფათო ბრძოლის ველებზე ასრულებდნენ.