ზელენსკი: რუსეთმა ტრამპის გარიგებისთვის უკრაინას დარტყმებით „მადლობა“ გადაუხადა

დიზელის შეთანხმება მოსკოვზე ოთხწლიანი დასავლური ფინანსური ზეწოლის კურსს არღვევს. ამავე დროს, კიევის ევროპელი და ნატოელი მოკავშირეები სანქციების გეგმის შეცვლას ცდილობენ. ევროკავშირის უმაღლესმა დიპლომატმა კაია კალასმა განაცხადა, რომ დიზელის შეთანხმება „ომის საწარმოებლად მოსკოვს მეტ შემოსავალს აძლევს“.

კალასმა შაბათს თქვა: „ახლა რუსეთზე ზეწოლის შემსუბუქების დრო არ არის და ევროპა ამას არ გააკეთებს“. მან დასძინა: „ორშაბათს ევროკავშირის საგარეო საქმეთა მინისტრები ომის დაწყების შემდეგ რუსეთის სამხედრო მანქანის წინააღმდეგ სანქციების სიაში პირთა და ორგანიზაციათა ყველაზე დიდი ჯგუფის დამატებას გეგმავენ“. საუბარია ევროკავშირის სანქციების შავ სიაში 1 600 ახალი ფიზიკური პირისა და ორგანიზაციის ოფიციალურად დამატებაზე.

ევროპის წამყვანი მთავრობები ცდილობენ, არაპროგნოზირებად ტრამპთან დიპლომატიური და სავაჭრო ურთიერთობები უკრაინის მხარდაჭერასთან დააბალანსონ.

გერმანიის მთავრობის პრესსპიკერმა შტეფან კორნელიუსმა განაცხადა, რომ ბერლინი „რუსეთის წინააღმდეგ დაწესებული სანქციების ერთგული რჩება და ევროპელ პარტნიორებთან ერთად დამატებით სანქციებზე მუშაობს“. მან დასძინა, რომ უკრაინის მხარდაჭერა „უცვლელი რჩება“.

შვედეთის პრემიერ-მინისტრმა ულფ კრისტერსონმა აშშ-ის შეთანხმების გამო „სინანული“ გამოხატა. მისი თქმით, ენერგეტიკული შემოსავლები „რუსეთის აგრესიული ომის დაფინანსების სასიცოცხლოდ მნიშვნელოვანი წყაროა“.

ზელენსკიმ შაბათს განაცხადა, რომ რუსეთმა „დანაკარგები უნდა იგრძნოს“ და საპასუხო მოქმედება დაჰპირდა. რუსეთის მიერ ოკუპირებულ ლუგანსკის რეგიონში უკრაინულმა თავდასხმებმა ბოლო 24 საათში ოთხი მშვიდობიანი მოქალაქე იმსხვერპლა და ხუთი დაჭრა. ამის შესახებ რეგიონის რუსეთის მიერ დანიშნულმა გუბერნატორმა ლეონიდ პასეჩნიკმა შაბათს განაცხადა.

ზელენსკის თქმით, უკრაინა ომში „დეესკალაციის ნაბიჯებისთვის“ მზადაა, თუმცა მხოლოდ იმ შემთხვევაში, თუ რუსეთიც იმავეს გააკეთებს.

რუსეთის საწვავის წარმოება ზელენსკისა და ტრამპის უთანხმოების მნიშვნელოვან საკითხად იქცა. ტრამპი უკრაინის მიერ რუსეთის ნავთობგადამამუშავებელი ქარხნების დაბომბვის შეჩერებას ცდილობდა, რადგან, მისი თქმით, ეს დიზელის გლობალურ დეფიციტს ამწვავებს. უკრაინის ლიდერმა ეს მოთხოვნა უარყო, თუ რუსეთი უკრაინის ენერგეტიკულ ინფრასტრუქტურაზე თავდასხმებს არ შეწყვეტს.

ფაინენშალ ტაიმსის ცნობით, მაიამიში მოლაპარაკებების დროს ტრამპის წარმომადგენლებმა, სტივ უიტკოფმა და ჯარედ კუშნერმა, უკრაინელებს უთხრეს, რომ თუ კიევი დარტყმებს არ შეწყვეტდა, აშშ-ს შესაძლოა სადაზვერვო ინფორმაციის გაზიარება შეეწყვიტა.

თემებიდონალდ ტრამპივლადიმერ პუტინივოლოდიმირ ზელენსკიიური უშაკოვიკაია კალასილეონიდ პასეჩნიკისტივ უიტკოფიულფ კრისტერსონიშტეფან კორნელიუსიჯარედ კუშნერი

გამოქვეყნდა 10 ოქტომბერი, 2026