500 ნიანგის ბინადარი მდინარე ოლიმპიურ ნიჩბოსნობას უმასპინძლებს

მდინარე, სადაც დაახლოებით 500 მლაშე წყლის ნიანგი ბინადრობს, 2032 წლის ბრისბენის ოლიმპიურ და პარალიმპიურ თამაშებზე ნიჩბოსნობისა და კანოეთი რბოლის შეჯიბრებებს უმასპინძლებს.

ავსტრალიის ქუინზლენდის შტატის ქალაქ როკჰემპტონში, ფიცროის მდინარეზე მდებარე მარშრუტმა შესაბამისობის დამოუკიდებელი ტექნიკური შეფასება გაიარა.

შეფასება ნიანგებს არ შეხებია. სპეციალისტებმა შეისწავლეს, როგორ იმუშავებდა მარშრუტი სხვადასხვა პირობებში, ამინდის განსხვავებული სცენარების, წყლის დონისა და დატბორვის რისკის გათვალისწინებით. მათ თამაშების პერიოდთან ერთად თამაშებამდე დარჩენილი დროც შეაფასეს.

ანგარიში თამაშების ინფრასტრუქტურისა და კოორდინაციის დამოუკიდებელმა სამსახურმა (Games Independent Infrastructure and Coordination Authority, GIICA) შეუკვეთა. სამსახურის ცნობით, ფიცროის მდინარის მშვიდწყლიანი სპორტის ობიექტი უკვე გამოიყენება ვარჯიშისა და შეჯიბრებებისთვის. იქ იმართება სკოლებს შორის შტატის ჩემპიონატები, ადგილობრივი რეგატები და ეროვნული ნაკრებების საწვრთნელი შეკრებები.

ნიჩბოსნობის მსოფლიო ფედერაციამ (World Rowing) და მსოფლიო კანოეს ფედერაციამ (Paddle Worldwide), რომელსაც ადრე კანოეს საერთაშორისო ფედერაცია ერქვა, მარშრუტი მოიწონეს.

ნიჩბოსნობის მსოფლიო ფედერაციის პრეზიდენტმა ჟან-კრისტოფ როლანმა განაცხადა: „ჩატარებული ვრცელი ანალიზის საფუძველზე, ახლა ვიცით, რომ თამაშების პერიოდში ფიცროის მდინარეს სამართლიანი შეჯიბრების პირობების უზრუნველყოფა შეუძლია. ეს პირობები ოლიმპიური და პარალიმპიური ნიჩბოსნობის მოთხოვნებს შეესაბამება“.

მსოფლიო კანოეს ფედერაციის პრეზიდენტმა თომას კონიეცკომ თქვა: „ჩატარებული ტექნიკური სამუშაოს ხარისხმა და სიღრმემ საშეჯიბრო სივრცეზე ჩვენი ცოდნა მნიშვნელოვნად გააუმჯობესა. ეს ჩვენ და ჩვენს სპორტსმენებს გვარწმუნებს, რომ მარშრუტი კანოეთი სპრინტში სამართლიანი შეჯიბრების პირობებს უზრუნველყოფს“.

„ბრისბენი 2032-ის“ (Brisbane 2032) პრეზიდენტმა ენდრიუ ლივერისმა შარშან ნიანგებთან დაკავშირებულ საკითხს დიდი მნიშვნელობა არ მიანიჭა.

მან მაშინ თქვა: „ოკეანეში ზვიგენები არიან, თუმცა სერფინგს მაინც ვაგრძელებთ... აქ მიდგომა უნდა იყოს, რომ შეგვიძლია და არა ის, რომ არ შეგვიძლია. გთხოვთ, დამოკიდებულება შეცვალოთ“.

ლივერისმა ხუთშაბათს, მას შემდეგ, რაც ობიექტმა თანხმობა მიიღო, განაცხადა: „ეს მოწონება მეტ სიცხადეს გვაძლევს, როცა ობიექტის დაგეგმვისა და თამაშების ჩატარების მომდევნო ეტაპზე გადავდივართ. ამასთან, ყველა სამომავლო საპროექტო და საოპერაციო სამუშაო კვლავ მხოლოდ როკჰემპტონზე იქნება მიმართული“.