ადვოკატი მკვლელობის საქმეში AI-ის გამოგონილი მოწმეების გამო დააჯარიმეს

მოსამართლემ ადვოკატს ჰკითხა: „კოლეგავ, ახალ ამბებს უყურებთ?“ მანამდე ადვოკატმა აღიარა, რომ ChatGPT-ს რისკების გააზრების გარეშე დაეყრდნო.

როიტერსის ცნობით, ნიუ-მექსიკოს უზენაესმა სასამართლომ ადვოკატი დასაჯა. მან კლიენტის მკვლელობისთვის გამამტყუნებელი განაჩენის გასაჩივრებისას ხელოვნური ინტელექტის მიერ გამოგონილი მოწმეები და პოლიციელების ყალბი ჩვენებები გამოიყენა. სასამართლომ ოთხშაბათს წარდგენილ დოკუმენტში სტივენ აარონსი 5 000 დოლარით დააჯარიმა და სასამართლოს უპატივცემულობაში ცნო. მიზეზი მის მიერ „ხელოვნური ინტელექტით შექმნილ დოკუმენტში ფაქტობრივი მტკიცებებისა და სამართლებრივი საფუძვლების გადაუმოწმებლობა“ გახდა.

დოკუმენტის თანახმად, ტექსტი „მთლიანად გამოგონილი მოწმეების ცრუ ჩვენებებს“ შეიცავდა. მასში მსროლელის ტანსაცმელსა და გარეგნობაზე „ცრუ ჩვენებაც“ იყო. მოსამართლე სი შენონ ბეიკონმა აგვისტოს სხდომაზე აარონსს ჰკითხა, რატომ არ იცოდა ხელოვნური ინტელექტის რისკების შესახებ. ადვოკატმა აღიარა, რომ ChatGPT გამოიყენა და ეგონა, სასამართლო პროცესის „უტყუარ შეჯამებას“ მიიღებდა. როიტერსის ცნობით, მოსამართლე ბეიკონმა თქვა: „კოლეგავ, ახალ ამბებს უყურებთ? რადიოს უსმენთ? საერთოდ კითხულობთ რამეს იმის შესახებ, თუ რა ხდება მსოფლიოში? ადვოკატების მიერ ხელოვნური ინტელექტის ჰალუცინაციებზე დაყრდნობის პრობლემა ყოველდღე მთავარი ამბავია“.

სამუშაოში ხელოვნური ინტელექტის ხელსაწყოებს სულ უფრო მეტი ადვოკატი იყენებს. შესაბამისად, სასამართლოებიც უფრო ხშირად აღმოაჩენენ ხელოვნური ინტელექტის მიერ გამოგონილ, ანუ ჰალუცინირებულ, ციტირებებს. გასულ წელს მოსამართლემ ორი იურიდიული კომპანია მკაცრად გააკრიტიკა. მათ წარადგინეს დოკუმენტი, რომელიც „უამრავ ყალბ, არაზუსტ და შეცდომაში შემყვან სამართლებრივ მითითებასა და ციტატას“ შეიცავდა. MyPillow-ის მაიკ ლინდელის ადვოკატებიც დაჯარიმდნენ, რადგან დოკუმენტში ხელოვნური ინტელექტით შექმნილი არასწორი ციტატები და ყალბი მითითებები შეიტანეს.

აარონსმა როიტერსს განუცხადა: „ვნანობ, თუმცა იმედი მაქვს, სადისციპლინო საბჭო გაითვალისწინებს, რომ ეს უნებლიე შეცდომა იყო“.