აშშ-ის ბანკები სესხების გაცემის პირობებს ამკაცრებენ

აშშ-ის ბანკები სესხების გაცემის სტანდარტებს ამკაცრებენ, რადგან ეკონომიკის მდგომარეობასთან დაკავშირებული შეშფოთება იზრდება. ამის შესახებ ფედერალური სარეზერვო სისტემის ახალ გამოკითხვაშია ნათქვამი.

ფედერალური სარეზერვო სისტემის საბანკო დაკრედიტების პრაქტიკის უფროს ოფიცერთა გამოკითხვა, რომელიც ოქტომბერს მოიცავს და 2 ნოემბერს გამოქვეყნდა, მესამე კვარტალში საკრედიტო პირობების არათანაბარ სურათს აჩვენებს. განსაკუთრებით მცირე ბიზნესს, მაღალი რისკის მქონე ოჯახებსა და კომერციული უძრავი ქონების სექტორს შეეზღუდა სესხებზე წვდომა.

ოქტომბრის კვარტალურმა კვლევამ, რომელიც 61 ადგილობრივი ბანკისა და აშშ-ში მოქმედი უცხოური კრედიტორების 18 ფილიალის პასუხებს აერთიანებდა, მესამე კვარტალში სესხის გაცემის სტანდარტების, პირობებისა და მოთხოვნის ცვლილებები შეისწავლა.

კვლევა ბანკების მიერ გაცხადებულ საკრედიტო სტანდარტებს, პირობებსა და მოთხოვნას აღრიცხავს და არა გაცემული სესხების რეალურ მოცულობას. ის საკრედიტო პირობებისა და განწყობების ცვლილების სურათს გვთავაზობს.

მსხვილი და საშუალო ზომის კომპანიებისთვის კომერციული და სამრეწველო დაკრედიტება წინა გამოკითხვასთან შედარებით, ძირითადად, უცვლელი დარჩა. თუმცა ბანკებმა მცირე ბიზნესისთვის სესხების გაცემის პირობები გაამკაცრეს.

ანგარიშის თანახმად, ბანკებმა ყველა ზომის კომპანიებისთვის მაღალი რისკის მქონე სესხებზე დაწესებული საკომისიოების სტანდარტები გაამკაცრეს. კრედიტორებმა ცვლილების მთავარ მიზეზებად ეკონომიკური პერსპექტივის გაუარესება ან მეტი გაურკვევლობა და ცალკეულ დარგებში პრობლემების გამწვავება დაასახელეს.

კომერციული უძრავი ქონებაც პრობლემურ სფეროდ იქცა. ბანკების ცნობით, პირობები გამკაცრდა მშენებლობისა და მიწის განვითარების, არასასოფლო-სამეურნეო დანიშნულების არასაცხოვრებელი უძრავი ქონებისა და მრავალბინიანი საცხოვრებლების დაკრედიტებისას. ამასთან, სესხებზე მოთხოვნა კომერციული უძრავი ქონების ყველა კატეგორიაში შემცირდა.

აშშ-ის ბანკები ასევე ამკაცრებენ საკრედიტო სტანდარტებს არასაბანკო ფინანსური კომპანიებისთვის, მათ შორის კერძო კაპიტალის ფონდებისა და ბიზნესისა და იპოთეკური დაკრედიტების შუამავლებისთვის. ეს უკან დახევა კერძო კაპიტალის ფონდებისა და ბიზნესის დაკრედიტების შუამავლების მხრიდან ლიკვიდურობაზე მზარდ მოთხოვნას ემთხვევა. კრედიტორებმა კვლავ აღნიშნეს ეკონომიკაში არსებული გაურკვევლობა და არასაბანკო ფინანსური ინსტიტუტების მსესხებლების ფინანსური მდგომარეობის გაუარესებასთან დაკავშირებული შეშფოთება.

ბანკებმა იპოთეკური სესხების პირობები, ძირითადად, უცვლელი დატოვეს. გარკვეულწილად შემსუბუქდა მოთხოვნები დიდი მოცულობის იპოთეკურ სესხებზე, თუმცა გამკაცრდა დაბალი საკრედიტო რეიტინგის მქონე მსესხებლებისთვის. ამასთან, ბანკების ცნობით, საცხოვრებელი უძრავი ქონების ყველა კატეგორიაში სესხებზე მოთხოვნა, მთლიანობაში, შემცირდა.