აშშ-მ რუსეთის ხუთ სავარაუდო აგენტს ბრალი წაუყენა

აშშ-ის იუსტიციის სამინისტრომ სამშაბათს რუსეთის დაზვერვის ხუთ სავარაუდო აგენტს ბრალი წაუყენა. მათ კრემლის დავალებით თავდასხმებისა და მკვლელობების მოსაწყობად გლობალური ქსელის შექმნაში ედებათ ბრალი. ეჭვმიტანილები კვლავ ძებნილები არიან.

აშშ-ის იუსტიციის სამინისტრომ ხუთ სავარაუდო აგენტს მსოფლიოს სხვადასხვა ქვეყანაში, მათ შორის აშშ-ში, თავდასხმებისა და მკვლელობების დაგეგმვაში დასდო ბრალი.

სამინისტრომ განცხადებაში აღნიშნა, რომ სულ მცირე 2024 წლიდან მოქმედმა ჯგუფმა ამ ზაფხულს აშშ-ში მცხოვრები „ცნობილი რუსი დისიდენტის“ მკვლელობა სცადა. უწყებას სამიზნის ვინაობა არ დაუსახელებია.

ეროვნული უსაფრთხოების საკითხებში გენერალური პროკურორის თანაშემწემ ჯონ აიზენბერგმა განაცხადა, რომ ჯგუფის წევრები „გლობალური მკვლელობების ქსელის“ შემადგენლობაში მოქმედებდნენ, რომელიც აშშ-შიც აღწევდა.

აიზენბერგის თქმით, ისინი კრემლის დავალებით მკვლელობების ჩასადენად აშშ-ის მოქალაქეებისა და უცხოელების გადაბირებას ცდილობდნენ.

განცხადების თანახმად, სამი მთავარი ეჭვმიტანილია რუსეთის სადაზვერვო სამსახურების ყოფილი პოლკოვნიკი, 63 წლის იური ხრამეევი, მისი 27 წლის ვაჟი კირილი და 35 წლის კუბელი ოემის რომაგოსა დურუთი.

კიდევ ორი ეჭვმიტანილი, კუბელი იაიდელ დელგადო სუარესი და ვენესუელელი ანხელ ედუარდო კასტრო, სავარაუდოდ, აშშ-ში ადამიანების გადაბირებაზე მუშაობდნენ.

განცხადებაში აღნიშნულია, რომ რუსი დისიდენტის მკვლელობის მცდელობა ჯგუფის უახლესი ოპერაცია იყო.

გეგმა ჩაიშალა, რადგან სამიზნეზე თვალთვალისთვის გადაბირებულმა კაცმა მკვლელობაზე უარი თქვა. მას ამისთვის 40 000 დოლარი შესთავაზეს.

განცხადების თანახმად, გასულ წელს იმავე მიზეზით ჩაიშალა ლიეტუვაში სამიზნის მკვლელობის გეგმა. ჯგუფის მტკიცებით, სამიზნე „რუსეთის შესახებ ტყუილებს ავრცელებდა“.

განცხადებაში ასევე დასახელებულია დაგეგმილი თავდასხმები სამოქალაქო და სამხედრო ინფრასტრუქტურაზე უკრაინის მხარდამჭერ ევროპულ ქვეყნებში.

გენერალურმა პროკურორმა ტოდ ბლანშმა განაცხადა: „ჩვენი მოვალეობაა, ამერიკის მოწინააღმდეგეებს ამერიკის მიწაზე ძალადობისა და ტერორის გაჩაღების საშუალება არ მივცეთ“.