ლავროვმა რუბიოსთან შეხვედრა მოკლე, თუმცა არცთუ ცუდად შეაფასა

ლავროვმა პრესკონფერენციაზე თქვა, რომ მათ ურთიერთობები და მრავალმხრივ ფორმატებში თანამშრომლობა განიხილეს. მათ შორის იყო გაერო, დიდი ოცეული და აზია-წყნარი ოკეანის ეკონომიკური თანამშრომლობა (APEC).

ლავროვის თქმით, მისასალმებელია აშშ-ის მზადყოფნა, რუსეთთან სხვადასხვა დონეზე დიალოგი შეინარჩუნოს. მოსკოვმა და ვაშინგტონმა უნდა განახორციელონ ურთიერთსასარგებლო პროექტები, სადაც მათი ინტერესები ემთხვევა, და არ უნდა დაუშვან, რომ უთანხმოება დაპირისპირებაში გადაიზარდოს.

ეკონომიკურ კავშირებზე საუბრისას ლავროვმა რუსეთსა და აშშ-ს შორის დიზელის საწვავით ვაჭრობის შეთანხმება დაიცვა. მისი თქმით, მოსკოვს ენერგორესურსების გაყიდვაზე შეზღუდვები არ აქვს და ურთიერთსასარგებლო შეთანხმებებს მხარს დაუჭერს.

ლავროვმა აღიარა, რომ შეთანხმებას აშშ-ის კონგრესში აკრიტიკებდნენ. მან გააფრთხილა, რომ ეს ურთიერთობებში გარღვევად არ უნდა შეფასდეს, რადგან ვაშინგტონის სანქციები რუსეთის წინააღმდეგ კვლავ ძალაშია.

ლავროვმა ასევე გააკრიტიკა უკრაინისთვის აშშ-ის სამხედრო დახმარების გაგრძელება და კიევთან დაზვერვითი ინფორმაციის გაზიარება.

ლავროვმა განაცხადა: „ამიტომ, პრაქტიკაში რეალურ პროგრესს ვერ ვხედავთ“.

ლავროვის თქმით, მოსკოვი მხარს უჭერს აშშ-ის თავმჯდომარეობის ძალისხმევას, დიდი ოცეულის დისკუსიები დეპოლიტიზებული იყოს და ყურადღება ჯგუფის თავდაპირველად შეთანხმებულ დღის წესრიგზე გამახვილდეს. ის მოიცავს გეოპოლიტიკის გავლენას ეკონომიკაზე, ენერგეტიკას, სურსათის უსაფრთხოებასა და მიწოდების ჯაჭვებს.

ლავროვმა აშშ-ს საკითხების ღიად განხილვის შესაძლებლობისთვის მადლობა გადაუხადა და მიდგომას სწორი უწოდა. თუმცა, მისი თქმით, გაურკვეველი რჩებოდა, რამდენად აისახებოდა დისკუსიები საბოლოო დოკუმენტებში.

კითხვაზე, გაიმართებოდა თუ არა ჩინეთში დაგეგმილი აზია-წყნარი ოკეანის ეკონომიკური თანამშრომლობის სამიტის ფარგლებში რუსეთის, აშშ-ისა და ჩინეთის ლიდერების შეხვედრა, ლავროვმა უპასუხა, რომ სამივე ქვეყნის დედაქალაქში ამ იდეას დადებითად უყურებდნენ. მან დასძინა, რომ ორგანიზაციულ საკითხებს მასპინძელი ქვეყანა, ჩინეთი აგვარებდა.

აშშ-ის სახელმწიფო მდივნის, მარკო რუბიოს მასპინძლობით გამართულ დიდი ოცეულის საგარეო საქმეთა მინისტრების შეხვედრაში მსოფლიოს წამყვანი ეკონომიკების უმაღლესი დიპლომატები მონაწილეობენ. ისინი გლობალურ ეკონომიკურ გამოწვევებზე, გეოპოლიტიკურ დაძაბულობაზე, ენერგეტიკასა და სურსათის უსაფრთხოებაზე, ნაოსნობის თავისუფლებასა და მიწოდების ჯაჭვების მდგრადობაზე მსჯელობენ.

შეხვედრა საერთაშორისო კონფლიქტების ფონზე იმართება. მათ შორისაა ომი უკრაინაში და ირანთან დაკავშირებული დაძაბულობა, რაც რეგიონული სტაბილურობისა და მსოფლიო ეკონომიკის გამო შეშფოთებას იწვევს.