ავსტრალიამ და ფილიპინებმა თავდაცვის ახალი შეთანხმება გააფორმეს

ფილიპინელი ოფიციალური პირების ცნობით, ავსტრალიამ და ფილიპინებმა კვირას თავდაცვის შეთანხმება გააფორმეს, რომელიც ერთობლივი პატრულირების, სამხედრო წვრთნებისა და სტიქიური უბედურებების დროს დახმარების ორგანიზებას გაამარტივებს.

შეთანხმებას მანილაში ხელი მოაწერეს ფილიპინების თავდაცვის მინისტრმა ჟილბერტო ტეოდორო უმცროსმა და ავსტრალიის ელჩმა მარკ ინეს-ბრაუნმა. ცერემონიას ავსტრალიის პრემიერ-მინისტრი ენტონი ალბანეზი დაესწრო, რომელიც რეგიონული სამიტების ფარგლებში ქვეყანას სტუმრობდა.

თავდაცვის სფეროში თანამშრომლობის შეთანხმება 1995 წლის შეთანხმებას ანახლებს. ის ეფუძნება ძალების დროებით განლაგების ცალკე შეთანხმებას, რომელიც 2012 წლიდან მოქმედებს. ეს შეთანხმება თითოეულ ქვეყანას მეორის ტერიტორიაზე სამხედროების გაწვრთნის უფლებას უკვე აძლევს.

ტეოდოროს თქმით, ახალი შეთანხმება ერთობლივი საქმიანობის განხორციელების პროცედურებს გაამარტივებს.

„იმის ნაცვლად, რომ ერთი საქმის გასაკეთებლად 100 ნაბიჯი იყოს საჭირო, ახლა მხოლოდ 10 დაგვჭირდება“, განუცხადა მან ჟურნალისტებს, როიტერსის ცნობით.

მისი თქმით, ქვეყნების საზღვაო, საჰაერო და სახმელეთო ძალებს შორის უფრო მჭიდრო თანამშრომლობა ფილიპინებს საფრთხეების შეკავებაში დაეხმარება, მათ შორის სამხრეთ ჩინეთის ზღვაში.

ავსტრალიის განცხადებით, შეთანხმება ინფორმაციის გაზიარებას, სამხედრო დაგეგმვასა და წვრთნას, ზღვაში საქმიანობის მონიტორინგსა და თავდაცვითი ინფრასტრუქტურის განვითარებას მოიცავს.

კითხვაზე, იყო თუ არა შეთანხმება ჩინეთის წინააღმდეგ მიმართული, ალბანეზიმ თქვა: „ეს არც ერთი კონკრეტული ქვეყნის წინააღმდეგ არ არის მიმართული. ეს ყველა ქვეყნის სუვერენიტეტის მხარდაჭერას ემსახურება“.

მისი თქმით, ავსტრალიის ვაჭრობის დიდი ნაწილი სამხრეთ ჩინეთის ზღვაზე გადის. მან ხაზი გაუსვა საზღვაო მარშრუტების ღიად შენარჩუნების მნიშვნელობას.

ავსტრალიამ ასევე გამოაცხადა დამატებითი დაფინანსება სამხრეთ-აღმოსავლეთ აზიის საზღვაო პარტნიორობის პროგრამისთვის. პროგრამა რეგიონულ პარტნიორებს გადასცემს სადაზვერვო და ზედაპირულ დრონებს, დაცული კავშირის აღჭურვილობასა და წვრთნას. ეს მათ ზღვაში საფრთხეებისა და კიბერშეტევების აღმოჩენასა და მათზე რეაგირებაში დაეხმარება. განცხადებაში დაფინანსების ოდენობა მითითებული არ ყოფილა.

შეთანხმებას წინ უძღოდა ფილიპინების რამდენიმე ბოლოდროინდელი ნაბიჯი, რომლებსაც ქვეყანა პარტნიორებთან სამხედრო კავშირების გასაძლიერებლად დგამდა.

9 ნოემბერს იაპონია დათანხმდა, ფილიპინების სამხედროებისთვის სანაპირო რადარი და სათვალთვალო დრონები მიეწოდებინა. ეს 4,3 მილიარდი იენის (24 მილიონი ევროს) გრანტის ფარგლებში მოხდება. აღჭურვილობა ქვეყნის გარშემო წყლებში გემების მონიტორინგს შეუწყობს ხელს.