ბელგიის პრემიერ-მინისტრმა ბიუჯეტის დავის გამო გადადგომა შესთავაზა

ბელგიის პრემიერ-მინისტრმა ბარტ დე ვევერმა მეფე ფილიპეს გადადგომის შესახებ განცხადება წარუდგინა, იუწყებიან Brussels Times-ი და ბელგიის სამეფო სასახლე.

დე ვევერი პრემიერ-მინისტრი 2025 წლის თებერვალში გახდა. მან თანამდებობიდან წასვლა მას შემდეგ გადაწყვიტა, რაც 2027 წლის ბიუჯეტზე მოლაპარაკებები ჩაიშალა, ხოლო შაბათ-კვირას მინისტრებთან გამართულმა ინდივიდუალურმა შეხვედრებმა ჩიხიდან გამოსავალი ვერ მოიტანა. სამეფო სასახლეს გადადგომა ჯერ არ მიუღია და მმართველ კოალიციაში შემავალი პარტიების ლიდერებთან კონსულტაციებს გამართავს.

თუ მეფე დე ვევერის გადადგომას მიიღებს, შესაძლოა ახალი არჩევნები დაინიშნოს, წერს Brussels Times-ი. კიდევ ერთი შესაძლებლობაა არჩევნების გარეშე ახალი მთავრობის ჩამოყალიბება, წინა არჩევნების შედეგად შექმნილი ძალთა განაწილების საფუძველზე.

მეფე ფილიპე პრემიერ-მინისტრს 6 ნოემბერს კვლავ შეხვდება.

ბელგიური ფასიანი ქაღალდების დეპოზიტარი Euroclear რუსეთის ცენტრალური ბანკის იმ აქტივების ძირითად ნაწილს ფლობს, რომლებიც 2022 წელს, უკრაინაში რუსეთის სრულმასშტაბიანი შეჭრის დაწყებისას გაიყინა. მათი მოცულობა დაახლოებით 190 მილიარდი ევროა. ევროკავშირს ამ თანხის უკრაინისთვის „რეპარაციების სესხად“ გამოყენება სურდა, თუმცა დე ვევერი აქტივების ჩამორთმევის ერთ-ერთი ყველაზე აქტიური მოწინააღმდეგე იყო. მას ფინანსური რისკები აშფოთებდა და სხვა ქვეყნებს სთხოვდა, სამართლებრივი გარანტიები მიეცათ, რომ ამ რისკებს ბელგიასთან ერთად გაინაწილებდნენ.