ბულგარეთის არჩევნების ბედი პრორუსმა ამომრჩევლებმა შეიძლება გადაწყვიტონ

არჩევნების შედეგად, სავარაუდოდ, მეორე ტური გაიმართება. მასში პრეზიდენტის მოვალეობის ამჟამინდელი შემსრულებელი ილიანა იოტოვა გავა, რომელიც არჩევნების ფავორიტია. მას პრეზიდენტ რუმენ რადევის მმართველი პარტია „პროგრესული ბულგარეთი“, კრემლის მხარდამჭერი ბულგარეთის სოციალისტური პარტია და მცირე ნაციონალისტური ულტრამემარჯვენე პარტია VMRO-BND უჭერენ მხარს.

საარჩევნო რბოლის გეოპოლიტიკური დაპირისპირების მეორე მხარეს ყოფილი დროებითი პრემიერ-მინისტრი ანდრეი გიუროვი დგას. ევროკავშირის მხარდამჭერ და დასავლური ორიენტაციის კანდიდატს მემარჯვენე-ცენტრისტული ოპოზიციური პარტიები „ჩვენ ვაგრძელებთ ცვლილებას“ და „დემოკრატიული ბულგარეთი“ უჭერენ მხარს.

გიუროვისა და კიდევ ერთი კანდიდატის, სოფლის მეურნეობის ყოფილი მინისტრის, ივან ხრისტანოვის გარდა, თითქმის ყველა კანდიდატი ევროსკეპტიკურ და ნაციონალისტურ საარჩევნო კამპანიას აწარმოებს. ეს კამპანიები ხშირად რუსეთისადმი სიმპათიის გამომხატველ პოზიციებთან ახლოსაა.

ექსპერტების თქმით, ასეთი პოზიციების მხარდამჭერმა ამომრჩევლებმა პირველ ტურში შესაძლოა იოტოვას სხვადასხვა მეტოქეს დაუჭირონ მხარი. თუმცა, თუ ნოემბრის დასაწყისში გამართულ მეორე ტურში მას გიუროვის მსგავსი ევროკავშირის მხარდამჭერი კანდიდატი დაუპირისპირდება, ამ ამომრჩევლებმა შესაძლოა არჩევანი შეცვალონ და იოტოვას მიემხრონ.