თურქეთში ყოფილ მინისტრს საფონდო ბირჟის თაღლითობის საქმეზე დაკავება შეუფარდეს

სტამბოლის სასამართლომ პარასკევს თურქეთის მმართველი სამართლიანობისა და განვითარების პარტიის (AKP) ყოფილი მინისტრისა და თავმჯდომარის მოადგილის, ფატმა ბეთულ საიან ქაიას დაკავება ბრძანა. საქმე საფონდო ბირჟაზე მასშტაბურ ფინანსურ თაღლითობაში მის სავარაუდო მონაწილეობას ეხება.

სტამბოლის პროკურატურამ ქაიას ბრალი წაუყენა „ორგანიზებული დანაშაულებრივი ჯგუფის წევრობასა და საფონდო ბირჟის შესახებ კანონის დარღვევაში“.

მის ქმარს, ილიას ქაიას, და კაპიტალის ბაზრების საბჭოს ყოფილ თავმჯდომარეს, იბრაჰიმ ომერ გონულს, ქვეყნის დატოვება აუკრძალეს, თუმცა ისინი არ დაუკავებიათ.

ფატმა ბეთულ საიან ქაია 2016-დან 2018 წლამდე ოჯახისა და სოციალური პოლიტიკის მინისტრი იყო. პრეზიდენტ რეჯეფ თაიფ ერდოღანის მმართველი AKP-ის თავმჯდომარის მოადგილის თანამდებობიდან ის სექტემბერში გადადგა, მას შემდეგ, რაც მის და მისი ქმრის მიერ აქციების ოპერაციებთან დაკავშირებით ბრალდებები გავრცელდა.

ქაიას ბრალად ედება აქციების ფასებით მანიპულირების გზით უკანონო სარგებლის მიღება. გავრცელებული ინფორმაციით, მან საინვესტიციო ფონდში 163 მილიონი თურქული ლირა (დაახლოებით 2,7 მილიონი ევრო) ჩადო და 2,17 მილიარდი ლირა (დაახლოებით 38,4 მილიონი ევრო) მიიღო.

ცოლ-ქმარი დანაშაულს უარყოფს. მათ მიღებული მოგების ნაწილი საბანკო მარეგულირებლების მიერ მითითებულ ანგარიშზე გადარიცხეს.

AKP-მა და მთავრობამ დაკავების ბრძანებას კარგი მმართველობის დასტური უწოდეს.

თურქეთის იუსტიციის მინისტრმა აქინ გურლექმა პარასკევს, საიან ქაიას დაკავების შემდეგ, X-ზე დაწერა: „ჩვენ წინ მივდივართ და ვახლდებით! მუდმივად ხელახლა ვიბადებით. ვემიჯნებით მათ, ვინც ცუდად იქცევა და საკუთარ სურვილებს ემორჩილება, და გზას უწინდელზე უფრო ძლიერები ვაგრძელებთ“.

გამოძიების ფარგლებში უკვე 100-ზე მეტი ადამიანი დააკავეს. თურქეთის კაპიტალის ბაზრების საბჭომ კი შვიდი პორტფელის მართვის კომპანიის მიერ მართული 131 საინვესტიციო ფონდის ლიკვიდაცია ბრძანა.

როიტერსის ცნობით, ფონდების აქტივების ღირებულება დაახლოებით 18,8 მილიარდი ევროა, ხოლო მათში დაახლოებით 353 000 ინვესტორია ჩართული. თურქულმა ტელეარხმა ინვესტორთა საერთო რაოდენობად 514 000-ზე მეტი დაასახელა.

ქაიას ოჯახს საჯარო სამსახურში მუშაობის გამოცდილება აქვს. მისი ძმა, ომერ ფათიჰ საიანი, ტელეკომუნიკაციების მარეგულირებელი უწყების ყოფილი ხელმძღვანელი და ტრანსპორტის მინისტრის მოადგილე, ივლისში ენერგეტიკის ბაზრის მარეგულირებელ საბჭოში დანიშნეს.

მისი და, აიშე ჰილალ საიან ქოითაქი, რომელიც ადრე ქუვეითსა და ბაჰრეინში ელჩი იყო, სექტემბერში ფინეთში ელჩად დანიშნეს. მეორე და, ნაზმიე სუმეიე საიანი, ადრე სტამბოლის მუნიციპალიტეტის საბჭოს წევრი იყო.