რუსეთის თავდასხმების შემდეგ კიევი ელექტროენერგიის პრობლემებს ებრძვის

კიევში კვლავ მძიმე თავდასხმების შესახებ განაცხადეს. მერმა ვიტალი კლიჩკომ ღამით ტელეგრამზე დაწერა, რომ ბალისტიკურმა რაკეტებმა უკრაინის ინფრასტრუქტურას დაარტყა. კლიჩკოს თქმით, აფეთქებები ქალაქის გარეუბანში მოხდა, კიევის ცენტრშიც კი კი ათზე მეტი აფეთქება გაისმა. ხუთი ადამიანი დაშავდა.

უკრაინის საჰაერო ძალებისა და სამხედრო სფეროსთან დაახლოებული დამკვირვებლების ცნობით, თავდასხმების სამიზნე ქალაქის ტერიტორიაზე და კიევის სამხრეთით მდებარე თბოელექტროსადგურები, ასევე, დედაქალაქის დასავლეთით მდებარე ქვესადგური იყო. პრეზიდენტმა ვოლოდიმირ ზელენსკიმ განაცხადა, რომ კიევსა და მის მიმდებარე რეგიონს 172 დრონი და 36 ბალისტიკური რაკეტა ესროლეს.

კლიჩკომ დაწერა, რომ უკრაინის დედაქალაქის ელექტროენერგიით მომარაგება „უკიდურესად მძიმე“ მდგომარეობაშია. დაზიანებულია წყალმომარაგებაც და ცენტრალური გათბობის სისტემაც. ასევე დაზიანდა მნიშვნელოვანი ხიდი მდინარე დნეპრზე, რომელიც დედაქალაქის დასავლეთ და აღმოსავლეთ ნაწილებს აკავშირებს. ექსპერტები ზარალის მასშტაბს აფასებენ.

მანამდე ზელენსკიმ ვიდეომიმართვაში ენერგეტიკულ ობიექტებსა და მდინარე დნეპრის ხიდებზე ახალი თავდასხმების შესახებ გააფრთხილა.

ზელენსკიმ პარასკევს კლიჩკო უკრაინის დედაქალაქში ელექტროენერგიის განმეორებითი გათიშვების გამო გააკრიტიკა. ზელენსკიმ ისინი „ქალაქის დონეზე გათბობის სეზონისთვის მოსამზადებელი გადაწყვეტილებების შეუსრულებლობისა და უკრაინის ენერგეტიკულ სექტორზე ამ რუსული ოპერაციის“ შედეგად შეაფასა. ამის გამო, მისი თქმით, სამმილიონიან ქალაქში მდგომარეობა განსაკუთრებით მძიმეა.

რუსეთის თავდაცვის სამინისტრომ ხიდზე თავდასხმა იმით გაამართლა, რომ მას უკრაინის სამხედრო ტრანსპორტირებისთვისაც იყენებენ. საერთაშორისო ჰუმანიტარული სამართალი ხიდების მსგავს მნიშვნელოვან ინფრასტრუქტურას განსაკუთრებულად იცავს. მოსკოვის ჩამონათვალის თანახმად, ასევე დაესხნენ თავს უკრაინული ფრთოსანი რაკეტის, „ფლამინგოს“, მწარმოებელ ქარხანას, კიევის სამხრეთით მდებარე ტრიპილიის ელექტროსადგურს და ჟიტომირის ოლქში მდებარე ქვესადგურს.

უკრაინამაც კვლავ შეუტია რუსეთს. უკრაინის სამხედროებმა მდინარე ვოლგაზე მდებარე რუსეთის ქალაქ სარატოვის ნავთობგადამამუშავებელი ქარხანა აირჩიეს სამიზნედ. სახელმწიფო რუსული საინფორმაციო სააგენტო „ტასის“ ცნობით, ოლქის ადმინისტრაციამ რამდენიმე საცხოვრებელი სახლის დაზიანების შესახებ განაცხადა. სოციალურ ქსელებში გავრცელებულ ვიდეოებზე ქარხნის ტერიტორიაზე ხანძრები ჩანს. გავრცელებული ცნობით, ასევე მოხვდა მოსკოვის სამხრეთ-დასავლეთით, ორიოლში მდებარე სამხედრო დანიშნულების ქარხანას.

რუსეთ-უკრაინის ომში საჰაერო თავდასხმების ესკალაციის შესახებ წაიკითხეთ აქ.