პოლონეთში დაზვერვამ რუსეთის სავარაუდო აგენტები დააკავა

პოლონეთის შიდა უსაფრთხოების სააგენტომ (ABW) რამდენიმე სავარაუდო აგენტი დააკავა. მათ, სავარაუდოდ, რუსეთის დავალებით იარაღისა და საბრძოლო მასალის დასამზადებელი კომპონენტები მოიძიეს.

დაზვერვის სამსახურების კოორდინაციის მინისტრმა ტომაშ სიემონიაკმა X-ზე დაწერა, რომ ეჭვმიტანილებს შორის არიან 37 წლის რუსეთის მოქალაქე ქალი და 25-დან 52 წლამდე ასაკის ხუთი პოლონელი.

სიემონიაკის თქმით, ჯგუფის წინააღმდეგ საგამოძიებო ღონისძიებები 21 ოქტომბრიდან 2 ნოემბრამდე მიმდინარეობდა. ამ პერიოდში სამ რეგიონში 21 მისამართი გაჩხრიკეს.

გამოძიების თანახმად, ჯგუფმა სხვადასხვა ნივთი შეიძინა, რომლებიც იარაღისა და საბრძოლო მასალის დასამზადებლად გამოიყენება. ნივთები, სავარაუდოდ, რუსეთში უნდა გაეტანათ. გაზეთ „გაზეტა ვიბორჩას“ ცნობით, მასალების ღირებულება 2 მილიონ ზლოტიზე მეტი უნდა ყოფილიყო, რაც დაახლოებით 455 000 ევროს უდრის.

გაზეთის ცნობით, ნივთები ონლაინმაღაზიაში იყიდეს, შემდეგ კი მანქანებში დამალეს და ასე გადაიტანეს საზღვარზე, კალინინგრადის ექსკლავში. გაზეთის ინფორმაციით, მესაზღვრეებმა გზავნილების ნაწილი ჩამოართვეს.

პროკურატურის ცნობით, ჯგუფის ყველა წევრის წინააღმდეგ კრიმინალურ გაერთიანებაში წევრობის ბრალდებით გამოძიება მიმდინარეობს. ოთხ მათგანს ჯაშუშობაშიც ეჭვობენ.

ევროკავშირისა და ნატოს წევრი პოლონეთი რუსეთის მიერ თავდასხმის სამიზნე უკრაინის ერთ-ერთი მთავარი პოლიტიკური და სამხედრო მხარდამჭერია. ქვეყანამ მეზობელი ქვეყნიდან თითქმის ერთი მილიონი ლტოლვილიც მიიღო.

ვარშავის მთავრობა რუსეთსა და მის მოკავშირე ბელარუსს ადანაშაულებს, რომ მათი დაზვერვის სამსახურები ქვეყანაში ბევრ აგენტს გზავნიან.

რუსეთის დაზვერვის სამსახურების სამიზნე, როგორც ჩანს, კიევის აშკარა მოკავშირე გერმანიაც სულ უფრო ხშირად ხდება. ოქტომბერში გამომძიებლებმა ორი ეჭვმიტანილი დააკავეს, რომლებსაც, სავარაუდოდ, დივერსიული თავდასხმები ჰქონდათ დაგეგმილი.