ესპანეთის რკინიგზაზე მომხდარი კატასტროფის შემდეგ ევროკავშირმა გამოძიება დაიწყო

ევროკავშირის პროკურორებმა გამოძიება დაიწყეს, რათა დაადგინონ, ხომ არ მოხდა ევროკავშირის სახსრების არამიზნობრივი გამოყენება. თანხები ესპანეთის იმ სარკინიგზო ხაზის განახლებას უნდა მოხმარებოდა, სადაც გასულ კვირას მომხდარმა მატარებლების შეჯახებამ 69 ადამიანი იმსხვერპლა.

ესპანეთის სამოქალაქო გვარდიის სპეციალური დანაყოფის მხარდაჭერით მოქმედმა პროკურორებმა განაცხადეს, რომ გამოძიებას სარკინიგზო ინფრასტრუქტურის სააგენტო „ადიფისა“ (Adif) და რკინიგზის უსაფრთხოების სააგენტო AESF-ის ოფისებში ატარებდნენ.

28 ოქტომბერს მადრიდი-სევილიის ჩქაროსნულ ხაზზე მომხდარი ავარია ამ საუკუნეში ევროპაში ერთ-ერთი ყველაზე მძიმე სარკინიგზო კატასტროფა იყო.

ეს წელს ესპანეთის რკინიგზაზე ევროკავშირის სახსრებთან დაკავშირებული თაღლითობის მეორე გამოძიებაა. იანვარში, ადამუსში, იმავე ხაზზე მომხდარ ავარიას 46 ადამიანი ემსხვერპლა.

გასულ კვირას სახელმწიფო კომპანია „რენფეს“ (Renfe) მატარებელი კერძო ესპანური კომპანია „ირიოს“ (Iryo) გაჩერებულ მატარებელს დაეჯახა. შეჯახება სოფელ ურდასთან მოხდა, მადრიდიდან დაახლოებით 130 კმ-ის (80 მილის) დაშორებით.

მატარებლების მდებარეობის მაკონტროლებელი საკომუნიკაციო სისტემა LZB გათიშული იყო. „რენფეს“ მატარებელს მოძრაობის ჩვეულებრივი სიჩქარით გაგრძელების ნებართვა მისცეს, მიუხედავად იმისა, რომ წინ მდგომმა „ირიოს“ მატარებელმა მოძრაობა ვერ განაახლა.

იმავე ხაზზე, ცხრა თვის შუალედით მომხდარ ორ ავარიას 115 ადამიანი ემსხვერპლა, ათეულობით კი დაშავდა.

რკინიგზის ტრაგედიით გამოწვეული შოკი მწუხარებამ და აღშფოთებამ შეცვალა პოლიტიკურად დაყოფილ ესპანეთში

ესპანეთის ტრანსპორტის მინისტრი სასიკვდილო ავარიიდან რამდენიმე დღეში გადადგა

ევროპის პროკურატურამ (EPPO) პარასკევს განაცხადა, რომ ესპანეთის სარკინიგზო უწყებებში საგამოძიებო მოქმედებები დაიწყო. პროკურატურის თქმით, გამოძიება ეხება „მადრიდი-სევილიის ჩქაროსნულ ხაზზე უსაფრთხოების, სიგნალიზაციისა და კომუნიკაციის სისტემების განახლებისა და მოდერნიზაციისთვის გამოყოფილ ევროკავშირის სახსრებთან დაკავშირებულ შესაძლო თაღლითობას“.

ევროპის პროკურატურამ საქმეზე საზოგადოების დიდი ინტერესი აღნიშნა, თუმცა განაცხადა, რომ დამატებითი დეტალები საჯაროდ არ გახმაურდებოდა.

პროცესის ფარგლებში, საქმეზე დანიშნულმა ესპანელმა მოსამართლემ უნდა უზრუნველყოს, რომ გამოძიება სამართლებრივ გარანტიებს შეესაბამებოდეს. მათ შორის, მოსამართლემ უნდა დაამტკიცოს ნებისმიერი მოქმედება, რომელიც შეიძლება ჩხრეკას ან სატელეფონო მოსმენას მოიცავდეს.