რუსული ექსტრემისტული ჯგუფი ბომბის ცრუ მუქარებთან კავშირს უარყოფს

„მამაკაცთა სახელმწიფომ“, ქალთმოძულე ექსტრემისტულმა ჯგუფმა, რომლის სახელიც ამ კვირაში იტალიის აეროპორტებში გავრცელებულ ბომბის ცრუ მუქარებში ფიგურირებდა, უარყო კავშირი ცრუ შეტყობინებებთან, რომლებმაც ევროპაში ფრენები შეაფერხა.

ბი-ბი-სისთან კომენტარი მას შემდეგ გაკეთდა, რაც ავიაკომპანიების მიმართ ახალი მუქარების შესახებ ცნობები გავრცელდა. მათ შორის იყო Ryanair-ის რეისი რომიდან ლისაბონის მიმართულებით და Wizz Air-ის რეისი პრაღიდან რომისკენ, რომელიც ვენეციაში გადაამისამართეს.

პარასკევს ბომბის მუქარა ირლანდიის რამდენიმე ცნობილ მედიაორგანიზაციასაც მიუვიდა. ამის გამო შენობების ევაკუაცია ჩატარდა. ირლანდიის მთავრობამ განაცხადა, რომ შესაძლოა საქმე „შეფერხებების კოორდინირებულ კამპანიასთან“ გვქონდეს.

ბი-ბი-სის რუსულ სამსახურს „ტელეგრამზე“ ანგარიშმა უპასუხა. ის რამდენიმე ანგარიშიდან ერთ-ერთია, რომლებიც ე.წ. „მამაკაცთა სახელმწიფოსა“ და მის დამფუძნებელ ვლადისლავ პოზდნიაკოვთან არის დაკავშირებული. ანგარიშმა დასცინა ვარაუდს, რომ ჯგუფმა მუქარის შემცველი წერილები გააგზავნა.

შეტყობინებაში ნათქვამია: „რომელი მამაკაცთა სახელმწიფო? სად ნახეთ ის? მრავალი წელია, აღარ არსებობს. ხვალ, მაგალითად, თუ პუტინის სახელით მუქარის წერილს მოაწერენ ხელს, ჩვენს პრეზიდენტთან დაკავშირებას შეეცდებით, რომ თქვენი სულელური კითხვა დაუსვათ?“

ჯგუფი რუსეთში 2021 წელს აკრძალეს, ხოლო ვარაუდობენ, რომ პოზდნიაკოვი ამჟამად საზღვარგარეთ ცხოვრობს. მას შემდეგ ზოგიერთ ადგილას ჯგუფმა სახელი „მამაკაცთა ლეგიონად“ შეიცვალა.

ბი-ბი-სიმ პირველადი ცრუ მუქარის წერილი ნახა. ის ხუთშაბათს, 07:21-ზე გაიგზავნა, სათაურით „გაფრთხილება მუქარის შესახებ“.

წერილი რომის აეროპორტების მმართველი კომპანიის, Aeroporti di Roma-ს (ADR), რამდენიმე ოფისსა და თანამშრომელს გაეგზავნა. შეტყობინება ქალაქის ფიუმიჩინოს აეროპორტის მისამართებზეც მივიდა. წერილის გამგზავნის ელფოსტის მისამართი, როგორც ჩანს, კოლუმბიის დედაქალაქ ბოგოტას სახელმწიფო ჯანდაცვის სამსახურს უკავშირდება.

გაურკვეველია, მიიღეს თუ არა იგივე ან მსგავსი მუქარა სხვა ქვეყნების აეროპორტებმა ან ავიაკომპანიებმა. პარასკევს გავრცელებული ერთ-ერთი მუქარა, როგორც ჩანს, ელფოსტით კი არა, ტელეფონით გადაიცა.

ხუთშაბათს რომში გაგზავნილი უცნაური ტექსტი უშეცდომო იტალიურით იყო დაწერილი. მასში ნათქვამი იყო, რომ „მამაკაცთა სახელმწიფოს“ „მებრძოლებმა“ იტალიის „ფემინისტური რეჟიმის“ წინააღმდეგ თავდასხმისას ორ ჩამომფრენ რეისზე ასაფეთქებელი მოწყობილობები განათავსეს. ტექსტის თანახმად, თავდასხმა „სამუდამოდ დაამახსოვრდებოდათ“.