სოკოლაცის დანაშაულისთვის ბოსნიელი სერბების არმიის ექვს ყოფილ წევრს 83 წლით პატიმრობა მიუსაჯეს

ბოსნიის სახელმწიფო სასამართლომ მეორე რომანიის ბრიგადის ექვს ყოფილ წევრს ჯამში 83 წლით პატიმრობა მიუსაჯა. მათ 1992 წელს, აღმოსავლეთ ბოსნიაში, სოკოლაცის მახლობლად კაცობრიობის წინააღმდეგ ჩადენილი დანაშაულები ედებოდათ ბრალად.

მომჩილო პაიჩს 20 წლით პატიმრობა მიუსაჯეს, მილადინ გაშევიჩს, 15 წლით, ხოლო ბრანისლავ კეჟუნოვიჩს, ჟელკო გაშევიჩს, იანკო სუკასა და ნიკოლა კოპრივიცას, თითოეულს 12 წლით.

პირველი ინსტანციის განაჩენით დრაგომირ ობრადოვიჩი და ალექსა გორდიჩი გაამართლეს.

სახელმწიფო სასამართლოს გადაწყვეტილებით, პაიჩი, კეჟუნოვიჩი, გაშევიჩი და სუკა პატიმრობაში უნდა დარჩნენ. მილადინ გაშევიჩი და სუკა სხდომას, რომელზეც განაჩენი გამოცხადდა, არ დასწრებიან.

განაჩენის თანახმად, ექვსმა ბრალდებულმა იცოდა სოკოლაცის რაიონში ბოსნიელი მუსლიმი მშვიდობიანი მოსახლეობის წინააღმდეგ ფართომასშტაბიანი და სისტემატური თავდასხმის შესახებ. თავდასხმა 1992 წლის მაისიდან სექტემბრამდე გაგრძელდა და მოიცავდა განიარაღებას, დაკავებებს, გადაყვანასა და სამხედრო ოპერაციებს.

თავმჯდომარე მოსამართლე ენიდა ჰაძიომეროვიჩმა განაჩენის დასაბუთებისას განაცხადა: „ბრალდებულებს ეს ყველაფერი შეუმჩნეველი ვერ დარჩებოდათ“.

სასამართლომ დაასკვნა, რომ სოფელ ნოვოსეოციში ოპერაციის მიზანი იმ მოსახლეობის ეთნიკური წმენდა იყო, რომელმაც მანამდე იარაღი ჩააბარა და სოკოლაცში ბოსნიელი სერბების ხელისუფლების ერთგული იყო.

მეორე რომანიის ბრიგადის წევრები, როგორც ცნობილია, სოფლის გარშემო 1992 წლის 21-22 სექტემბრის ღამეს განლაგდნენ. მოსამართლე ჰაძიომეროვიჩმა აღნიშნა, რომ განლაგებასა და დავალებების განაწილებას მომჩილო პაიჩი და მილადინ გაშევიჩი ხელმძღვანელობდნენ.

პაიჩი სამხედრო პოლიციის მეთაურად, ხოლო გაშევიჩი სადაზვერვო ასეულის მეთაურის მოადგილედ ცნეს დამნაშავედ.

განაჩენის თანახმად, სოფლის მცხოვრებლებს დილით სახლების დატოვება და მეტალკის ადგილას შეკრება უბრძანეს. მეორე რომანიის ბრიგადის მეთაურმა რადისლავ კრსტიჩმა პაიჩი ახლომდებარე ბულიუკოვინის ადგილას დაიბარა. მან პაიჩს ნოვოსეოციში დაბრუნება და შეთანხმებული გეგმის შესრულება უბრძანა, რომელიც კაცების დახოცვას, ქალებისა და ბავშვების კი დეპორტაციას ითვალისწინებდა.

ამასობაში, ნოვოსეოციში, სადაზვერვო ასეულის წევრმა სლავისა ცვეტიეტიჩმა მოკლა მოხუცი ქალი დევლა კარიჩი, რომელსაც ქმრის მოძებნა დაავალეს.

პაიჩის სოფელში დაბრუნების შემდეგ ქალები და ბავშვები კაცებს გამოაცალკევეს და ავტობუსით სარაევოში წაიყვანეს. განაჩენში ნათქვამია, რომ პაიჩმა კაცებს უთხრა, ისინი გაცვლისთვის შეარჩიეს.