ჩოგბურთის ლეგენდა რაფა ნადალი რეალ მადრიდის დირექტორთა საბჭოს წევრი გახდება

ჩოგბურთის ლეგენდამ, რაფა ნადალმა, ოთხშაბათს დაადასტურა, რომ რეალ მადრიდის დირექტორთა საბჭოს წევრობის შეთავაზება მიიღო.

ნადალი, რომელიც გუნდის დიდი ხნის გულშემატკივარია, რეალ მადრიდის საპატიო წევრია 2017 წლის მარტიდან.

კლუბმა ოთხშაბათს ნადალის შესახებ განცხადებაში აღნიშნა: „რეალ მადრიდისა და ყველა მადრიდისტასთვის უდიდესი პატივია, რომ ასეთი სპორტული და პიროვნული მასშტაბის მქონე ფიგურა, ესპანურ და მსოფლიო სპორტში გამორჩეული ადამიანი, ჩვენს დირექტორთა საბჭოს შეუერთდება და ამ როლიდან კლუბის აწმყოსა და მომავალში შეიტანს წვლილს“.

40 წლის ნადალმა Instagram-ზე გამოაქვეყნა ფოტო, რომელზეც პატარა ასაკში, მადრიდის ფორმაშია აღბეჭდილი. მან დაწერა: „მინდა მადლობა გადავუხადო პრეზიდენტ ფლორენტინო პერესსა და საბჭოს, რომ რეალ მადრიდის დირექტორთა საბჭოში გაწევრიანება შემომთავაზეს. მოწვევას დიდი ენთუზიაზმით დავთანხმდი, მსურს ვისწავლო და შეძლებისდაგვარად დიდი წვლილი შევიტანო“.

ნადალმა ჩოგბურთი 2024 წელს დატოვა. კარიერის განმავლობაში მან 22 დიდი ტურნირი მოიგო, მათ შორის რეკორდული 14 როლან გაროსი, ასევე 36 მასტერსის ტიტული და ორი ოლიმპიური ოქროს მედალი.

რეალ მადრიდმა დასძინა: „ნადალს ლეგენდარული სპორტული კარიერა ჰქონდა. თუმცა მისი პიროვნება მიღწევებზე გაცილებით მეტს გამოხატავს: ნიჭი, მუდმივი სწრაფვა გაუმჯობესებისკენ, თავგანწირვის უნარი, კონკურენტუნარიანობა, თავმდაბლობა, მეტოქეებისა და თანაგუნდელების პატივისცემა და სოლიდარობა მას მოედანს გარეთაც და მოედანზეც მისაბაძ ადამიანად აქცევს.

„ყველა ეს ღირებულება რეალ მადრიდის იდენტობის ნაწილია. რაფაელ ნადალი მათ მთელი სპორტული კარიერის განმავლობაში განასახიერებდა და იცავდა, რის შედეგადაც მთელ მსოფლიოში მილიონობით ადამიანისთვის მისაბაძ მაგალითად იქცა“.

რეალ მადრიდის საერთო კრებამ 21 ნოემბერს ნადალის საბჭოს ახალ წევრად დანიშვნა უნდა დაამტკიცოს.