დრონების შეტევების გამო მოსკოვისა და პეტერბურგის აეროპორტებმა რეისები შეაჩერეს

შეზღუდვები 16 ოქტომბრის დილამდე მოქმედებდა. საინფორმაციო სააგენტო „მოსკვას“ ცნობით, თითქმის 160 რეისი გადაიდო ან გაუქმდა. მათი უმეტესობა ვნუკოვოსა და შერემეტიევოზე მოდიოდა, შესაბამისად, 66 და 79 რეისი.

მოსკოვის მერმა სერგეი სობიანინმა განაცხადა, რომ საჰაერო თავდაცვის ძალებმა საღამოდან რუსეთის დედაქალაქისკენ მიმავალი 94 უკრაინული დრონი ჩამოაგდეს.

სანქტ-პეტერბურგის პულკოვოს აეროპორტიც დაიკეტა, შეზღუდვები დილის 9 საათამდე გაგრძელდა. სანქტ-პეტერბურგში დაფუძნებული გამოცემა „ფონტანკას“ ცნობით, 37 გასაფრენი და ცხრა ჩამოსაფრენი რეისი გაუქმდა ან გადაიდო. ლენინგრადის ოლქის გუბერნატორის, ალექსანდრ დროზდენკოს თქმით, რეგიონის თავზე ოთხი დრონი ჩამოაგდეს.

„ატლანტიკის“ ჟურნალისტმა საიმონ შუსტერმა წინა დღეს წყაროებზე დაყრდნობით დაწერა, რომ უკრაინის კამპანია, რომელიც რუსეთის აეროპორტების მუშაობის პარალიზებას ისახავს მიზნად, „ჯერ მხოლოდ იწყება“. უკრაინის პრეზიდენტმა ვოლოდიმირ ზელენსკიმ 1 სექტემბერს განაცხადა: „რუსეთის ცა სახიფათო ხდება, რადგან რუსეთის ცაში დრონები ისე დაიწყებენ გამოჩენას, რომ ამას ანგარიში უნდა გაეწიოს“.

შუსტერის ცნობით, უკრაინა ბოლო კვირებში შორ მანძილზე მოქმედ დრონებს იყენებდა, რათა რუსეთის აეროპორტების გარშემო საჰაერო სივრცის გამოყენება გაერთულებინა. თუმცა ზელენსკის თავდაპირველი გეგმის განხორციელება ჯერ არ დაუმტკიცებია. გეგმა გაცილებით აგრესიულ ტაქტიკას ითვალისწინებდა.

ოქტომბერში მოსკოვის აეროპორტები მუშაობას სულ უფრო ხშირად აჩერებდნენ. დამოუკიდებელმა რუსულმა საგამოძიებო გამოცემა „აგენტსტვომ“ გამოთვალა, რომ თვის პირველ 14 დღეში ოთხივე აეროპორტი ჯამში 101 საათით დაიკეტა. მთელი სექტემბრის განმავლობაში ეს მაჩვენებელი მხოლოდ 46 საათი იყო.