ევროპაში სულ მცირე 12 რეისს ბომბის აფეთქებით დაემუქრნენ

ხუთშაბათს ევროპაში სულ მცირე 12 რეისს ბომბის აფეთქებით დაემუქრნენ. კვირის დასაწყისში მომხდარი შვიდი მსგავსი შემთხვევის დროს ხელისუფლებამ ასაფეთქებელი ნივთიერებები ვერ იპოვა.

ირლანდიურმა ავიაკომპანია Aer Lingus-მა განაცხადა, რომ უსაფრთხოების მუქარის გამო მისი ერთ-ერთი რეისი დუბლინიდან რომისკენ საფრანგეთის აეროპორტში გადაიყვანეს.

საფრანგეთის პრემიერ-მინისტრის, სებასტიან ლეკორნის ოფისის განცხადებით, თვითმფრინავი პარიზის ჩრდილო-დასავლეთით, ევრუში უსაფრთხოდ დაეშვა. ბორტზე მყოფი 157 ადამიანი უსაფრთხო ადგილას გადაიყვანეს.

ბი-ბი-სი-ის ცნობით, ხუთშაბათს მუქარის მსგავსი შეტყობინებების შემდეგ კიდევ ორი რეისი გადაიყვანეს სხვა აეროპორტებში. Wizz Air-ის თვითმფრინავი მილანიდან ვარშავაში მიფრინავდა, თუმცა ვენაში გადაიყვანეს. Ryanair-ის რეისი ლონდონიდან სოფიაში მიფრინავდა, თუმცა ბულგარეთის ქალაქ პლოვდივში დაეშვა.

ფინურმა ავიაკომპანია Finnair-მა მაუწყებელ Yle-ს განუცხადა, რომ ჰელსინკიდან რომისა და ვენის მიმართულებით გაფრენის შემდეგ, ბომბის მუქარის გამო, მისი ორი თვითმფრინავი პოლიციამ შეამოწმა. რომისკენ მიმავალ თვითმფრინავს იტალიური გამანადგურებლებიც აცილებდნენ.

ხუთშაბათს დილით ბომბის მუქარა LOT-ის ვარშავიდან ბრიუსელის აეროპორტისკენ მიმავალ რეისსაც შეეხო. აეროპორტის წარმომადგენელმა, იჰსანე ჩიუკა ლეხლიმ, ბელგიურ გაზეთ Het Nieuwsblad-ს განუცხადა, რომ პოლიციამ თვითმფრინავი გაჩხრიკა და დამატებითი უსაფრთხოების ზომების საჭიროება არ დაინახა.

სავარაუდოდ, ბომბის აფეთქებით დაემუქრნენ სოფიისკენ მიმავალ Ryanair-ის კიდევ ორ რეისსაც, ერთი კოპენჰაგენიდან, მეორე კი მადრიდიდან.

ჩეხეთის პოლიციამ სოციალურ ქსელში დაწერა, რომ პრაღის აეროპორტისკენ მიმავალ ოთხ რეისსაც დაემუქრნენ. პოლიციამ მუქარის „სერიოზულობის დონე დაბლად“ შეაფასა.

ორშაბათსა და სამშაბათს ესპანეთის, პოლონეთის, იტალიისა და ბულგარეთის ხელისუფლებამ მუქარის შემდეგ შვიდი სამგზავრო თვითმფრინავი გაჩხრიკა. ასაფეთქებელი ნივთიერებები ვერ იპოვეს, თუმცა შეტყობინებების გამო ვარშავის შოპენის აეროპორტი დროებით დაიკეტა.

ავიაციის უსაფრთხოების ანალიტიკური კომპანია JACDEC-ის აღმასრულებელი დირექტორის, იან-არვედ რიხტერის თქმით, იმის ალბათობა, რომ ვინმემ თვითმფრინავში ბომბის შეტანა შეძლოს, დაბალია.

რიხტერმა თქვა: „დღეს კომერციულ თვითმფრინავში ასაფეთქებელი ნივთიერებების შეტანის პრაქტიკულად არანაირი გზა არ არსებობს. რეისის ბოლო რეალური აფეთქება 2015 წლის 31 ოქტომბერს მოხდა, ეგვიპტიდან რუსეთში მიმავალ თვითმფრინავზე. ამის მიზეზი უსაფრთხოების ხარვეზები და პერსონალის ნაკლოვანებები იყო, რომლებიც დაუყოვნებლივ აღმოფხვრეს“։