გერმანია ევროკავშირის ბიუჯეტის შემცირებას მოითხოვს

ჰანდელსბლატის (Handelsblatt) ხელთ არსებული ექვსი მთავრობის მეთაურის ერთობლივი წერილის თანახმად, ევროკომისიის წინადადება „რამდენიმე ასეული მილიარდი ევროთი“ უნდა შემცირდეს. წერილში ნათქვამია: „ამ დანაზოგის მიღებაში წვლილი ყველა მიმართულებამ უნდა შეიტანოს“.

28 სექტემბრით დათარიღებული წერილი ირლანდიის პრემიერ-მინისტრ მიჰოლ მარტინს (Micheál Martin) გაეგზავნა. მისი ქვეყანა ამჟამად ევროკავშირის საბჭოს თავმჯდომარეობს. წერილს გერმანიის კანცლერი ფრიდრიხ მერცი და დანიის, ნიდერლანდების, ავსტრიის, ფინეთისა და შვედეთის მთავრობების მეთაურები აწერენ ხელს. წერილის შესახებ ინფორმაცია პირველად ფაინენშალ ტაიმსმა გაავრცელა.

გადამწყვეტი მოლაპარაკებების დაწყებამდე ცოტა ხნით ადრე, ექვსმა ქვეყანამ 2028-2034 წლების მრავალწლიანი ფინანსური ჩარჩოს მოცულობაზე დავა გაამწვავა. საფრანგეთი და იტალია, რომლებიც გერმანიის შემდეგ სიდიდით მეორე და მესამე წმინდა გადამხდელები არიან, საპირისპირო მიმართულებას ემხრობიან და უფრო დიდ ბიუჯეტს მოითხოვენ.

ევროკომისიამ, რომელსაც პრეზიდენტი ურსულა ფონ დერ ლაიენი ხელმძღვანელობს, ახალი ბიუჯეტისთვის თითქმის ორი ტრილიონი ევრო შესთავაზა. გერმანიასა და მის თანამოაზრეებს ეს თანხა ზედმეტად მიაჩნიათ. წერილის თანახმად, კომისიამ მოქმედ ფინანსურ ჩარჩოსთან შედარებით ნომინალურად დაახლოებით 60%-იანი ზრდა წარადგინა. ექვსი ქვეყნის ლიდერები წერენ: „ეს უბრალოდ არარეალისტურია. არც ეკონომიკურად. არც პოლიტიკურად“.

საფრანგეთის პრეზიდენტმა ემანუელ მაკრონმა კი ჯერ კიდევ ივნისში განაცხადა, რომ ევროპამ კომისიის მიერ შეთავაზებული საბიუჯეტო ზრდა უნდა „მიიღოს“. მისი თქმით, ეს თავდაცვაში, ტექნოლოგიასა და კონკურენტუნარიანობაში მეტი თანხის ჩადებისთვისაა საჭირო. ამავდროულად, საფრანგეთსა და იტალიას ეროვნული შენატანების ზრდის თავიდან აცილება სურთ.

ამიტომ ევროკავშირის სიდიდით მეორე და მესამე ეკონომიკები ევროკავშირის შემოსავლის ახალ წყაროებს მოითხოვენ. საფრანგეთმა და იტალიამ ბიუჯეტის დასაფინანსებლად ახალი ციფრული მოსაკრებელი შესთავაზეს. მათ სურთ, ამ მოსაკრებლით მეტი პასუხისმგებლობა დააკისრონ მსხვილ ტექნოლოგიურ კომპანიებს, რომლებიც ევროპაში ჯერჯერობით ძალიან მცირე გადასახადებს იხდიან.

გერმანია და დანარჩენი ხუთი ქვეყანა წერილში შემოსავლის ახალ წყაროებს არ გამორიცხავენ. თუმცა ისინი აფრთხილებენ, რომ ამ გზით ბიუჯეტის მოცულობაზე დებატებს გვერდი არ უნდა აუარონ.

ექვსი მთავრობის მეთაურის თქმით, დიდი ზრდა გაუმართლებელია, განსაკუთრებით მაშინ, როცა რამდენიმე წევრ სახელმწიფოს საჯარო ფინანსების მოწესრიგება სჭირდება. ისინი წერენ, რომ ევროკავშირის ინსტიტუტებში პერსონალის გაზრდაც „დროის მოთხოვნებს აცდენილია“, რადგან ეროვნული ადმინისტრაციები სამუშაო ადგილებს ამცირებენ.