გერმანიის პროკურატურამ რუსეთის სავარაუდო ჯაშუშს ბრალი წაუყენა

ქალს ბერლინში პრორუსული ქსელის შექმნასა და გერმანიის თავდაცვის პოლიტიკის შესახებ კრემლისთვის ინფორმაციის მიწოდებას ედავებიან. გერმანიის ფედერალურმა პროკურატურამ რუსეთის სავარაუდო ჯაშუშს ბრალი წაუყენა.

ფედერალურმა პროკურატურამ ქალის წინააღმდეგ საბრალდებო დასკვნა ბერლინის უმაღლეს სამხარეო სასამართლოში წარადგინა. გერმანიის უმაღლესი ბრალდების ორგანო ქალს რუსეთის საელჩოში დაზვერვის თანამშრომლისთვის ინფორმაციის მიწოდებაში ადანაშაულებს. შესაბამისად, მას დაზვერვის აგენტად საქმიანობას ედავებიან.

გერმანიისა და უკრაინის მოქალაქე ქალი იანვარში დააკავეს. მას შემდეგ წინასწარ პატიმრობაში იმყოფება. ფედერალური პროკურატურის ბრალდებით, სავარაუდო აგენტს დაზვერვის თანამშრომელთან კავშირი არაუგვიანეს 2023 წლის ოქტომბრიდან ჰქონდა.

ფედერალური პროკურატურის განცხადებაში ნათქვამია: „ბრალდებული წლების განმავლობაში მას მაღალი დონის ღონისძიებების შესახებ მრავალ ცნობას აწვდიდა და უზრუნველყოფდა, რომ მას, ზოგჯერ ყალბი სახელით, ასეთ ღონისძიებებზე დასწრება შეძლებოდა“. უწყებამ დასძინა: „ამას მისთვის სადაზვერვო მიზნებისთვის საკუთარი ქსელის შექმნის შესაძლებლობა უნდა მიეცა“.

გამოძიების თანახმად, ბრალდებული ასევე ცდილობდა, „თავისი მიზნებისთვის გერმანიის თავდაცვის ფედერალური სამინისტროსა და შეიარაღების მრეწველობის წარმომადგენლები გადაებირებინა“. დაზვერვის თანამშრომლის დავალებით, იგი გერმანიის თავდაცვის პოლიტიკისა და შეიარაღების მრეწველობის შესახებ ინფორმაციის მოპოვებას ცდილობდა. მისი ინტერესი განსაკუთრებით უკრაინაში რუსეთის მიერ დაწყებულ ომს უკავშირდებოდა.

ბერლინის უმაღლესი სამხარეო სასამართლოს სახელმწიფო უსაფრთხოების სენატმა ახლა უნდა გადაწყვიტოს, გაიმართება თუ არა სასამართლო პროცესი და როდის დაიწყება ის.

ქალის ადრინდელი განცხადებები, როგორც ჩანს, მიუთითებს, რომ იგი იდეოლოგიური რწმენით მოქმედებდა. ფედერალური პროკურატურის ცნობით, გამოძიება კონსტიტუციის დაცვის ფედერალური სამსახურისა და სამხედრო კონტრდაზვერვის ფედერალური სამსახურის მიერ მოპოვებულ ინფორმაციას ეფუძნება.