გერმანიის სპეციალური ჯგუფი კიევისთვის იარაღის გარიგებებს აჩქარებს

ფაინენშალ ტაიმსის (Financial Times) ცნობით, გერმანიის თავდაცვის სამინისტროში მცირე, დამოუკიდებელი ჯგუფი „უკრაინის სპეციალური შტაბი“ მოქმედებს. მას კიევისთვის იარაღის გარიგებების ორგანიზება სულ რაღაც ორ კვირაში შეუძლია. სხვა დეპარტამენტებს გაცილებით მეტი დრო სჭირდებათ, რადგან ადგილობრივი შესყიდვების ბიუროკრატია აფერხებთ.

ჯგუფის ხელმძღვანელმა, ბრიგადის გენერალმა იოახიმ კაშკემ განაცხადა: „ჩვენ გადაწყვეტილებების მიღების უკიდურესად მოკლე ჯაჭვი გვაქვს. ეს მოქნილსა და სწრაფს გვხდის“.

ფაინენშალ ტაიმსი წერს, რომ უკრაინის ჯგუფი 2022 წელს შეიქმნა, რამდენიმე თვის შემდეგ, რაც რუსეთმა უკრაინაში სრულმასშტაბიანი შეჭრა დაიწყო. ჯგუფმა სწრაფად მოიპოვა ოპერატიული და ეფექტიანი უწყების სახელი. კონტრაქტებს გერმანიის ნაცვლად უკრაინის მთავრობა აფორმებდა, ამიტომ ჯგუფი გერმანიის შესყიდვების წესებს გვერდს უვლიდა.

მას შემდეგ ჯგუფის როლი რამდენჯერმე შეიცვალა. ამ პერიოდში გერმანია ფრთხილი მხარდაჭერიდან კიევის ერთ-ერთ მთავარ პარტნიორად იქცა. გასული წლის განმავლობაში სპეციალური შტაბი ცენტრად ჩამოყალიბდა, სადაც გერმანიისა და უკრაინის თავდაცვის სამინისტროები და თავდაცვის კომპანიები გამოცდილებასა და ტექნოლოგიებს ცვლიან.

ჯგუფი დღესაც მცირეა და 20-ზე ნაკლები ადამიანი მუშაობს. ჯგუფის მუშაობის მცოდნე წყარომ თქვა: „იქ ერთგვარი სტარტაპის ატმოსფეროა. მათ სისტემების ძალიან ღრმა ცოდნა აქვთ: იციან, რა მუშაობს და რა არის ზედმეტად ძვირი, ბრჭყვიალა სისულელე“.

გერმანია უკრაინის ერთ-ერთი მთავარი მოკავშირეა. სექტემბერში გერმანიის ხელისუფლებამ გადაწყვიტა, უკრაინისთვის საკუთარი მარაგებიდან ამერიკული Patriot-ის საჰაერო თავდაცვის სისტემების საზენიტო რაკეტების ნაწილი გადაეცა. უკრაინას ისინი რუსეთის სარაკეტო დარტყმების მოსაგერიებლად სჭირდება. ARD-Deutschlandtrend-ის ბოლო გამოკითხვამ აჩვენა, რომ დასავლეთ გერმანიაში გამოკითხულთა 39% უკრაინისთვის იარაღის მიწოდებას გადაჭარბებულად მიიჩნევს, აღმოსავლეთში კი ეს მაჩვენებელი 54%-ია.