ჰუსიები სანაზე დარტყმებში საუდის არაბეთს ადანაშაულებენ

შაბათს იემენის დედაქალაქ სანაში ძლიერი აფეთქებები გაისმა. ჰუსიების ცნობით, საუდის ძალებმა ამ ტერიტორიაზე საჰაერო დარტყმები განახორციელეს.

ერთმა კორესპონდენტმა სხვადასხვა რაიონში სულ მცირე ხუთი აფეთქება გაიგონა. კიდევ ერთმა კორესპონდენტმა დაინახა, როგორ ესროდა ორი სამხედრო თვითმფრინავი ქალაქს რაკეტებს.

ჰუსიებთან დაკავშირებულმა მედიასაშუალება ალ-მასირას ტელევიზიამ (Al-Masirah TV) დედაქალაქის წინააღმდეგ „საუდის აგრესიის“ შესახებ გაავრცელა ინფორმაცია. ტელევიზიას სამიზნეებისა და მსხვერპლის შესახებ დეტალები არ დაუსახელებია.

ტელეარხმა შაბათს უფრო ადრე ასევე გაავრცელა ინფორმაცია ჩრდილო-დასავლეთ საადის პროვინციაში სატელეკომუნიკაციო ქსელზე სარაკეტო დარტყმების შესახებ. საადა ჰუსიების დასაყრდენია.

ჰუსიების მტკიცებით, საუდის არაბეთმა ხუთშაბათ ღამით იემენის დედაქალაქი დაბომბა. მათი თქმით, ივლისში მხარეებს შორის ბრძოლების განახლების შემდეგ ეს პირველი შემთხვევა იყო.

რამდენიმეწლიანი სიმშვიდის შემდეგ, ივლისში იემენი კვლავ სამოქალაქო ომში ჩაეფლო. ერთმანეთს ირანის მხარდაჭერილი ჰუსიები და იემენის საერთაშორისოდ აღიარებული მთავრობა უპირისპირდებიან. ჰუსიები სანას ჩათვლით ჩრდილო-დასავლეთ იემენის უმეტეს ნაწილს აკონტროლებენ, მთავრობას კი მეზობელი საუდის არაბეთი უჭერს მხარს.

ქალაქ ადენში განთავსებული მთავრობა ქვეყნის სამხრეთისა და აღმოსავლეთის დიდ ნაწილს აკონტროლებს. ეს ტერიტორია უფრო დიდია, თუმცა ნაკლებად დასახლებული.

ოთხწლიანი მყიფე ზავის შემდეგ, საომარი მოქმედებები კვლავ განახლდა, როცა ირანმა სანაში ჰუსიების დელეგაციის თვითმფრინავი გაგზავნა.

რეისს საუდის არაბეთისგან ნებართვა არ მოუთხოვია. ამით მან ათი წლის განმავლობაში მოქმედი პრაქტიკა დაარღვია.

ერ-რიადმა საპასუხოდ სანას აეროპორტზე დარტყმები განახორციელა. ამის შემდეგ ჰუსიები 2022 წლის შემდეგ პირველად დაესხნენ თავს საუდის არაბეთის ტერიტორიას.

მას შემდეგ ბრძოლები გამწვავდა. ჰუსიებმა სწრაფი შეტევა წამოიწყეს და სტრატეგიული ბაბ-ელ-მანდების სრუტის სანაპირო ტერიტორიებზე კონტროლი დაამყარეს.

ჰუსიებმა საუდის არაბეთში რამდენიმე სამიზნეს, მათ შორის ნავთობის ინფრასტრუქტურასა და დედაქალაქ ერ-რიადს, დაარტყეს. მათ ასევე წითელ ზღვაში საუდის გემებისთვის საზღვაო ბლოკადა გამოაცხადეს.

AFP-ის ჟურნალისტმა განაცხადა, რომ შაბათს ერ-რიადის სამხრეთით საუდის ნავთობგიგანტ არამკოს ობიექტიდან ცეცხლი და კვამლი ამოდიოდა.

შემთხვევის გარემოებები გაურკვეველი დარჩა. თუმცა ბოლო კვირებში ჰუსიები არამკოს, რომლის აქციების უმრავლესობასაც საუდის სახელმწიფო ფლობს, თავს ესხმოდნენ.