ირანი: არაბი მინისტრები ჰორმუზის ნაოსნობის შეთანხმებას ომანში ხელს მოაწერენ

ირანის პრეზიდენტმა მასუდ ფეზეშკიანმა განაცხადა, რომ არაბული ქვეყნების საგარეო საქმეთა მინისტრები ორშაბათს ომანის დედაქალაქ მუსკატში შეიკრიბებიან. ისინი ჰორმუზის სრუტეში ირანსა და ომანს შორის ერთობლივი სანაოსნო მარშრუტის შექმნის შესახებ შეთანხმებას ხელს მოაწერენ.

ფეზეშკიანმა India Today-სთვის მიცემულ ინტერვიუში, რომელიც შაბათს გამოქვეყნდა, განაცხადა: „ამ კვირაში, ორშაბათს, არაბული ქვეყნების საგარეო საქმეთა მინისტრები მუსკატში შეიკრიბებიან. ისინი ჰორმუზის სრუტეში ომანსა და ირანს შორის ერთობლივი მარშრუტის შექმნის შესახებ შეთანხმებას ხელს მოაწერენ და ამის შესახებ საერთაშორისო საზღვაო ორგანიზაციას შეატყობინებენ“.

მან დასძინა: „ამ შეხვედრას ის ქვეყნებიც დაესწრებიან, რომელთა ტერიტორიებიც აშშ-მა ჩვენ წინააღმდეგ თავდასხმების დასაწყებად გამოიყენა“.

ფეზეშკიანმა აშშ-სთან ომსა და ირანზე დაწესებულ ეკონომიკურ ზეწოლაზე საუბრისას განაცხადა, რომ ვაშინგტონმა სამხედრო გზით მიზნებს ვერ მიაღწია და ამიტომ ეკონომიკურ ზომებს მიმართა.

მან თქვა: „მათ ომით მიზნებს ვერ მიაღწიეს, ამიტომ ეკონომიკურ ზეწოლაზე გადავიდნენ, მაგრამ ჩვენ არ გავჩერდებით“.

ირანის პრეზიდენტმა აშშ-ის მიერ ირანის საზღვაო ბლოკადაზეც ისაუბრა. მისი თქმით, ირანი საზღვაო მარშრუტებზე მთლიანად დამოკიდებული არ არის.

მან განაცხადა: „ჩვენი არსებობა ნამდვილად არ არის დამოკიდებული საზღვაო მარშრუტებზე და ისინი ვერც ამ გზით მიაღწევენ მიზნებს“.

ფეზეშკიანის თქმით, ირანი ჰორმუზის სრუტეს მაშინ გახსნის, როცა აშშ ბლოკადასა და თავდასხმებს შეწყვეტს.

ირანის საგარეო საქმეთა სამინისტროს პრესსპიკერმა ესმაილ ბაყაიმ პარასკევს განაცხადა, რომ ომანი ორშაბათს რეგიონულ მინისტერიალს უმასპინძლებს. შეხვედრაში სპარსეთის ყურის მოსაზღვრე რვა სახელმწიფო მიიღებს მონაწილეობას.

ბაყაის თქმით, შეხვედრაზე რეგიონულ საკითხებსა და ირანულ-ომანური მოლაპარაკებების შედეგებს განიხილავენ. მოლაპარაკებები ჰორმუზის სრუტეში კომერციული გემებისთვის უსაფრთხო მარშრუტების განსაზღვრას ეხებოდა.

მან განაცხადა, რომ ირანი სრუტეში უსაფრთხოების უზრუნველსაყოფად მუშაობს. თუმცა, მისი თქმით, ვიდრე აშშ-ის საზღვაო ბლოკადა და სამხედრო ჩარევა გრძელდება, გემების უსაფრთხოების გარანტირება შეუძლებელია.

ომანს ორშაბათის შეხვედრა დაუყოვნებლივ არ დაუდასტურებია.

ირანის ეროვნული უსაფრთხოების უმაღლესი საბჭოს მდივანმა მოჰსენ რეზაიმ გასულ ორშაბათს განაცხადა, რომ ომანთან ჰორმუზის სრუტეში ახალი დერეფნის შესახებ შეთანხმებას რამდენიმე დღეში მოაწერდნენ ხელს.