ტრამპი რუსეთის ფონდზე სანქციების მოხსნას განიხილავს

The New York Times-ის ცნობით, პრეზიდენტ დონალდ ტრამპის ადმინისტრაცია რუსეთის პირდაპირი ინვესტიციების ფონდზე (RDIF) სანქციების მოხსნას განიხილავს. ამის შესახებ გაზეთს რუსეთსა და აშშ-ს შორის მოლაპარაკებებთან დაახლოებულმა წყაროებმა უთხრეს.

წყაროების თქმით, რუსეთი RDIF-ისთვის სანქციების შემსუბუქებას ითხოვს, რათა ფონდმა შეძლოს რუსული დიზელის საწვავის აშშ-ში მიწოდებაში მონაწილეობა.

ერთ-ერთი წყაროს თქმით, აშშ-ის ფინანსთა სამინისტრო ფონდის განაცხადს სანქციების შემსუბუქების თაობაზე სტანდარტული პროცედურების შესაბამისად განიხილავს. RDIF-მა უნდა დაამტკიცოს, რომ სანქციების დაწესების საფუძველი აღარ არსებობს.

RDIF-ს კირილ დმიტრიევი ხელმძღვანელობს, რომელიც რუსეთსა და აშშ-ს შორის მოლაპარაკებებში მნიშვნელოვან როლს ასრულებს. დმიტრიევი კრემლის ძალისხმევას უძღვება, რომელიც ორ ქვეყანას შორის შესაძლო ერთობლივ ბიზნესპროექტებს ისახავს მიზნად.

RDIF 2011 წელს შეიქმნა, რათა რუსეთში უცხოური ინვესტიციები მოეზიდა. ფონდის მონაწილეობით განხორციელებული ყველაზე ცნობილი პროექტი რუსეთის კორონავირუსის საწინააღმდეგო ვაქცინა „სპუტნიკ V“ იყო. მიიჩნევა, რომ დმიტრიევი და მისი მეუღლე, ნატალია პოპოვა, რუსეთის პრეზიდენტ ვლადიმერ პუტინის უმცროს ქალიშვილთან, კატერინა ტიხონოვასთან, დაახლოებულები არიან.

პრეზიდენტ ჯო ბაიდენის ადმინისტრაციამ RDIF-ს სანქციები 2022 წლის 28 თებერვალს დაუწესა, უკრაინაში რუსეთის სრულმასშტაბიანი შეჭრიდან ოთხი დღის შემდეგ. მაშინ აშშ-ის ფინანსთა სამინისტრომ განაცხადა: „ფორმალურად, RDIF სუვერენული ფონდი არის, თუმცა მას ფართოდ მიიჩნევენ პრეზიდენტ ვლადიმერ პუტინის შავ სალაროდ და რუსეთის ფართო კლეპტოკრატიის სიმბოლოდ“.