ირანი აშშ-ის ბაზებზე თავდასხმებით იმუქრება

ირანის ხელმძღვანელობა აშშ-ს ისლამურ რესპუბლიკაზე ახალი თავდასხმების შესახებ აფრთხილებს. ირანის უსაფრთხოების საბჭოს გენერალურმა მდივანმა მოჰსენ რეზაიმ პლატფორმა X-ზე დაწერა: „თუ აშშ ირანის წინააღმდეგ კიდევ ერთ ომს დაიწყებს, ყველა სამხედრო ბაზა, რომელიც აგრესიაში მონაწილეობს, დასავლეთ აზიიდან ევროპამდე, ირანის სასიკვდილო თავდასხმების კანონიერი სამიზნე გახდება“. რეზაი დაემუქრა, რომ უსაფრთხო მანძილი, თავშესაფარი და იმუნიტეტი აღარ იქნება.

რამდენიმე დღის წინ აშშ-ის პრეზიდენტმა დონალდ ტრამპმა ირანთან სამხედრო დაპირისპირება „ფაქტობრივად დასრულებულად“ გამოაცხადა და თქვა: „არსებულ მდგომარეობას ვინარჩუნებთ და ამას მეზობელი ქვეყნების დაჟინებული თხოვნით ვაკეთებთ“.

ამის საპირისპიროდ, ირანის პარლამენტის თავმჯდომარემ მოჰამედ ბაღერ ღალიბაფმა ტელეარხ ალ ჯაზირას განუცხადა, რომ მისი ქვეყანა აპირებს, დაძლიოს მდგომარეობა, რომელსაც „არც ომი და არც მშვიდობა“ ეწოდება. ეს სულაც არ ნიშნავს, რომ გამოსავალი აუცილებლად მოლაპარაკებები იქნება, არამედ მდგრადი შეკავება. ვაშინგტონთან შეთანხმება შესაძლებელია, ბურთი კი აშშ-ის მხარესაა. ღალიბაფის თქმით, ტრამპის მთავრობას ირანის გზავნილისთვის ჯერჯერობით კონკრეტული პასუხი არ გაუცია. მან კვლავ მიუთითა შვიდ პირობაზე, რომლებიც აშშ-მა უნდა შეასრულოს, რათა ირანმა ჰორმუზის სრუტე გახსნას და მოლაპარაკებები დაიწყოს.

გავრცელებული ცნობებით, თეირანი აშშ-სგან, მათ შორის, ირანისა და რეგიონში მისი მოკავშირეების, მაგალითად, ლიბანში მოქმედი ჰეზბოლას წინააღმდეგ ყველა სამხედრო მოქმედების შეწყვეტას მოითხოვს. ასევე უნდა შეწყდეს ირანის პორტებისა და გემების საზღვაო ბლოკადა, მოიხსნას სანქციები და ნავთობის ექსპორტზე აკრძალვა, ხოლო ირანის გაყინული აქტივები გათავისუფლდეს. ამ ცნობების თანახმად, ირანი ომით მიყენებული ზიანისთვის კომპენსაციასაც ითხოვს. ნაკლებად სავარაუდოა, რომ აშშ-ის მთავრობა ამ მოთხოვნებს წინასწარ შეასრულებს.

ამასობაში, აშშ-ის სამხედრო ძალების შესაბამისმა რეგიონულმა სარდლობამ განაცხადა, რომ ამერიკული ძალები კვლავ დღე-ღამის განმავლობაში მუშაობენ, რათა სავაჭრო გემებისთვის ჰორმუზის სრუტე ღია შეინარჩუნონ და ირანის წინააღმდეგ „რკინის საზღვაო ბლოკადა“ მკაცრად გაატარონ.

თებერვლის ბოლოს ისრაელმა და აშშ-მა ირანის წინააღმდეგ ომი დაიწყეს. საპასუხოდ, ირანის ძალებმა მუქარითა და თავდასხმებით დიდი ხნის განმავლობაში ფაქტობრივად ჩაკეტეს გემების მიმოსვლა ჰორმუზის სრუტეში. რამდენიმე თვეა, აშშ-ის საზღვაო ძალები ცდილობს, სამოქალაქო გემების დაცვით სრუტეში ნავთობისა და თხევადი გაზის ვაჭრობა აღადგინოს.