ირანის ომისა და საწვავის გაძვირების გამო ტრამპს უკმაყოფილება ემუქრება

მიუხედავად ამისა, ტრამპი კონფლიქტის ეკონომიკურ გავლენას მუდმივად ამცირებს და მხარდამჭერებს მოუწოდებს, კონგრესის ორივე პალატაზე რესპუბლიკელთა კონტროლი შეინარჩუნონ.

ტრამპი არაერთხელ ამტკიცებს, რომ ომი მალე დასრულდება, თუმცა არჩევნების შემდეგ ახალი დაბომბვების დაწყებითაც იმუქრება. ეს ხშირად ერთსა და იმავე საარჩევნო გამოსვლაში ან ჟურნალისტებთან ერთ საუბარში ხდება.

ტრამპი ასევე ამტკიცებს, რომ ბენზინის გაძვირება დროებითი დისკომფორტია, რომლის ატანაც ირანის განიარაღებისთვის ღირს.

ტრამპმა შაბათ-კვირას მიჩიგანში გამართულ მიტინგზე განაცხადა, რომ ომის დაწყებას არ ნანობს. მან ისიც თქვა, რომ ომის ეკონომიკური გავლენა მოსალოდნელზე ნაკლები აღმოჩნდა.

„ვიღაცამ მითხრა: „თავიდან რომ გქონდეთ ამის გაკეთების შესაძლებლობა…““, უთხრა ტრამპმა მხარდამჭერ აუდიტორიას. „ვუპასუხე: „ხუმრობთ? მეგონა, ბენზინის ფასი ორჯერ ან სამჯერ მეტი იქნებოდა. ეს მცირე ფასია, რომელსაც მანიაკებისთვის ბირთვული იარაღის წართმევისთვის ვიხდით““.

ლიჰაის უნივერსიტეტის საზოგადოებრივი აზრის კვლევის ობსერვატორიის დირექტორის, კრისტოფერ ბორიკის თქმით, ტრამპის ურთიერთგამომრიცხავმა გზავნილებმა რესპუბლიკელი კანდიდატები რთულ, შესაძლოა გამოუვალ მდგომარეობაში ჩააყენა.

ბორიკმა აღნიშნა: „ტრამპის გზავნილები ომის შესახებ ამომრჩეველთა სულ უფრო მცირე ნაწილზე ახდენს გავლენას. მათთვის, ვისაც კონფლიქტის მიმართულება იმედს უცრუებს, პრეზიდენტის განცხადებებში თითქმის არაფერია ისეთი, რაც მათ უარყოფით დამოკიდებულებას შეცვლიდა“.

ირანის კონფლიქტის გამო ტრამპს მხოლოდ რამდენიმე არჩეული რესპუბლიკელი დაუპირისპირდა. თავად ტრამპი ამტკიცებს, რომ შუალედური არჩევნები კონფლიქტთან მის მიდგომაზე გავლენას არ მოახდენს.

თუმცა პარტიის ზოგიერთი სტრატეგი უკვე თვეებია განგაშს ტეხს.

ზაფხულის დასაწყისში, საარჩევნო კამპანიის ხელმძღვანელობასთან მომუშავე ან მნიშვნელოვან საარჩევნო ოლქებში ჩართულმა ხუთმა რესპუბლიკელმა სტრატეგმა „ასოშიეიტედ პრესს“ უთხრა, რომ გამაფრთხილებელი ნიშნები დაინახეს. მათი თქმით, თუ ომი მალე არ შეწყდებოდა, ის მათ კანდიდატებს დააზიანებდა.

ივნისში, მას შემდეგ, რაც ტრამპმა თეირანთან დროებითი ცეცხლის შეწყვეტის შეთანხმებას მიაღწია, ტრამპი და თეთრი სახლის წარმომადგენლები უფრო თავდაჯერებულად გამოიყურებოდნენ. თუმცა შეთანხმება რამდენიმე კვირაში ჩაიშალა.

ამის შემდეგ, ზოგიერთ საკვანძო ოლქში საარჩევნო კამპანიის წარმომადგენლებმა შიდა საუბრებში უფრო აქტიურად დაიწყეს იმის განხილვა, რომ 2024 წელს ტრამპის მიერ ადვილად მოგებული წარმომადგენელთა პალატის საარჩევნო ოლქები კონკურენტული ხდებოდა. ეს რესპუბლიკელმა სტრატეგებმა თქვეს, რომლებიც შიდა პარტიული მონაცემების საჯაროდ განხილვის უფლებამოსილებით არ სარგებლობდნენ და ანონიმურობის პირობით ისაუბრეს.

ნავთობის ფასმა მაისში პიკს მიაღწია, ივნისში დაეცა, სექტემბერში კი კვლავ გაიზარდა. ტრამპი ჯერ კონფლიქტის ესკალაციით იმუქრებოდა, შემდეგ უკან დაიხია და მიანიშნა, რომ შეთანხმება შესაძლოა მალე მიღწეულიყო. ივნისის შუა რიცხვებიდან ქვეყნის მასშტაბით ბენზინის საშუალო ფასი გალონზე 4 დოლარზე მაღლაა.

შრომის დღის დღესასწაულის შემდეგ სტრატეგებმა თქვეს, რომ შიდა გამოკითხვებში ამომრჩევლები ომს სულ უფრო ხშირად უკავშირებდნენ სურსათისა და მგზავრობის გაძვირებას.

ტრამპი იმ კრიტიკოსებს, რომლებიც ომს ამერიკელებისთვის ხელმისაწვდომობის კრიზისის გამომწვევად მიიჩნევენ, „თაღლითობისა“ და „აფიორის“ გამავრცელებლებად მოიხსენიებს. მისი თქმით, ეს დემოკრატების მოგონილია. სტრატეგების განცხადებით, შიდა საარჩევნო გამოკითხვები აჩვენებს, რომ ტრამპის არგუმენტმა ამერიკელ ამომრჩევლებში გავლენა ვერ მოიპოვა.

ინტერვიუებში ტრამპის გადაწყვეტილების მხარდამჭერი ზოგიერთი რესპუბლიკელი ამომრჩეველიც აღიარებს, რომ ბენზინის ფასები მოთმინებას უცდის.

59 წლის კლეი კოიმ თქვა, რომ ზოგჯერ უხერხულობას გრძნობს, როცა 2010 წლის „კრაისლერ სებრინგის“ ავზს ავსებს. მიუხედავად ამისა, ის დროებით უფრო მაღალი ფასის გადახდას თანახმაა, რათა აშშ-ისთვის, მისი აზრით, დიდი საფრთხე გაანეიტრალოს.

„მომწონს? არა, ეს ძველი ჯართი მყავს“, თქვა მიჩიგანის შტატის ქალაქ დევიტში მცხოვრებმა აუქციონერმა კოიმ. „მაგრამ დგება მომენტი, როცა უნდა შეჩერდე და იკითხო: „რა ღირს ამად?““

ზოგი ამომრჩევლის აზრით, ტრამპმა შეცდომა დაუშვა, როცა ივარაუდა, რომ ომი რამდენიმე კვირაში დასრულდებოდა.

აიოვის შტატის ქალაქ მოვილში მცხოვრებმა 61 წლის ელიზაბეთ მარლეტმა თქვა, რომ ისურვებდა, ტრამპს კონფლიქტისთვის ვადა არ დაესახელებინა. მას ასევე სურდა, პრეზიდენტს აშშ-ის სამხედროებისთვის თეირანის კაპიტულაციის იძულების მიზნით უფრო მკაცრი მოქმედება დაევალებინა. მიუხედავად ამისა, მარლეტი ტრამპს კვლავ უჭერს მხარს.

„ჩვენ მთავარსარდალს მხარი უნდა დავუჭიროთ, მაშინაც კი, თუ ყველაფერი მოსალოდნელზე მეტხანს გაგრძელდება“, თქვა მარლეტმა, რომელიც აიოვის რესპუბლიკელებით გაჯერებულ ჩრდილო-დასავლეთში მცირე ნახირის საქონლის ფერმას უძღვება. „ცხოვრება ასეთია და დაწყებულ საქმეს თავს ვერ ავარიდებთ“.

ამასობაში, ზოგი მხარდამჭერი ტრამპის მიერ ომის დაწყებას რესპუბლიკელი ლიდერის საარჩევნო დაპირების, „ამერიკა უპირველეს ყოვლისა“, ერთ-ერთი მთავარი პრინციპის ღალატად მიიჩნევს. ტრამპი პირობას დებდა, რომ აშშ „უსასრულო ომებში“ არ ჩაებმებოდა. ასეთმა ომებმა თეთრი სახლის ზოგიერთი მისი წინამორბედი დაასუსტა.

21 წლის შონ ო’ბრაიენმა, ალაბამაში, ობერნის უნივერსიტეტის სტუდენტმა, თქვა, რომ ტრამპის გადაწყვეტილებამ ირანთან ომის დაწყების შესახებ „ძალიან გაუცრუა იმედი“.

ო’ბრაიენი წლის დასაწყისში კონსერვატიული პოლიტიკური მოქმედების კონფერენციას დაესწრო, რომელიც პოლიტიკური მემარჯვენეებისთვის მნიშვნელოვანი შეკრებაა. ახლა ის საკუთარ პოლიტიკურ ერთგულებას თავიდან აფასებს.

„ამჟამად ვფიქრობ, რომ დემოკრატებს მივცემ ხმას“, თქვა ო’ბრაიენმა, რომელიც თავს დამოუკიდებელ ამომრჩევლად მიიჩნევს.

თემებიდონალდ ტრამპიელიზაბეთ მარლეტიკლეი კოიკრისტოფერ ბორიკინურ დუბოუშონ ო’ბრაიენიასოშიეიტედ პრესიირანი

გამოქვეყნდა 27 ოქტომბერი, 2026