ირანმა ბაჰრეინში აშშ-ის სარადარო სადგურზე თავდასხმა დაადასტურა

ირანის ისლამური რევოლუციის გვარდიის კორპუსმა განაცხადა, რომ ბაჰრეინში აშშ-ის ადრეული გაფრთხილების რადარს შეუტია. ეს ირანის სამხრეთში ტელეკომუნიკაციების ანძაზე, როგორც ირანი ამტკიცებს, საჰაერო იერიშის საპასუხო მოქმედება იყო.

ეს განცხადება ირანის სახელმწიფო საინფორმაციო სააგენტო IRNA-ს ცნობიდან რამდენიმე საათში გავრცელდა. სააგენტოს ცნობით, ოფიციალურ წყაროებზე დაყრდნობით, ხუთშაბათს ჰორმოზგანის პროვინციაში მდებარე საპორტო ქალაქ სირიკს „მტრის ცეცხლი“ მოხვდა.

ნახევრად ოფიციალური საინფორმაციო სააგენტო Tasnim-ის მიერ გავრცელებულ განცხადებაში გვარდიამ დარტყმას „სერიოზული გაფრთხილება“ უწოდა „აგრესორი მტრისთვის“. მისი თქმით, მტერმა ჰორმუზის სრუტეში საჰაერო პროვოკაციებისა და ნავთობის კონტრაბანდის სერია უნდა შეწყვიტოს.

განცხადებაში ნათქვამია: „თუ ეს დარღვევები და აგრესიული ქმედებები განმეორდება, გვარდიის საჰაერო-კოსმოსური ძალები სრული მზადყოფნით იმოქმედებენ, შეზღუდვების გარეშე“.

გვარდიასთან დაკავშირებული საინფორმაციო სააგენტო Fars-ის ცნობით, გვარდიის საჰაერო-კოსმოსურმა ძალებმა რადარული დანადგარი „დაიმიზნეს და გაანადგურეს“.

ვაშინგტონსა და მანამას ამ დროისთვის კომენტარი არ გაუკეთებიათ.

ბაჰრეინში აშშ-ის სამხედრო-საზღვაო ძალების მეხუთე ფლოტის შტაბ-ბინა მდებარეობს.

სააგენტო როიტერსის ცნობით, ეს სექტემბრის დასაწყისის შემდეგ პირველი შემთხვევაა, როცა ირანმა სპარსეთის ყურის რომელიმე ქვეყანაში აშშ-ის სამხედრო ობიექტზე თავდასხმა დაადასტურა.

ისრაელის მედიასაშუალებების, მათ შორის საზოგადოებრივი მაუწყებლის KAN-ის ცნობით, ისრაელის უსაფრთხოების კაბინეტმა სამხედროებს ირანზე შესაძლო თავდასხმისთვის მზადების გაძლიერება დაავალა.

ირანის უსაფრთხოების ხელმძღვანელმა მოჰსენ რეზაიმ გააფრთხილა, რომ თუ აშშ კიდევ ერთ ომს დაიწყებს, ირანის დარტყმების სამიზნე გახდება ნებისმიერი სამხედრო ბაზა, რომელიც ამ ომში მონაწილეობს, დასავლეთ აზიიდან ევროპამდე.

აშშ-ის პრეზიდენტმა დონალდ ტრამპმა განაცხადა, რომ მზადაა ომი განაახლოს, თუ კატარის მიერ შეთავაზებული დიპლომატიური გზა შეთანხმებამდე ვერ მიიყვანს მხარეებს.

სახელმწიფო მდივანმა მარკო რუბიომ კი თქვა, რომ ირანზე ეკონომიკური ზეწოლა იმდენად ეფექტიანია, რომ ფართომასშტაბიანი სამხედრო ოპერაციების განახლება საჭირო არ არის.

ირანის პარლამენტის სპიკერმა და მთავარმა მომლაპარაკებელმა მოჰამედ ბაგერ ღალიბაფმა ოთხშაბათს ალ ჯაზირასთან ექსკლუზიურ ინტერვიუში განაცხადა, რომ ჰორმუზის სრუტეში ომამდელი ვითარება ვეღარ დაბრუნდება. მისი თქმით, „ბურთი ახლა ამერიკელების მხარესაა“.