ირანი საპასუხო დარტყმების გაფართოებით იმუქრება, ისრაელი კი თავდასხმისთვის ემზადება

ისრაელმა, გავრცელებული ცნობით, სამხედროებს ირანზე შესაძლო დარტყმებისთვის მზადყოფნის გაძლიერება დაავალა. თეირანი კი აცხადებს, რომ თავდასხმის შემთხვევაში ომს რეგიონის ფარგლებს გარეთ გააფართოებს.

ისრაელის მედიამ ოთხშაბათს საღამოს გაავრცელა ინფორმაცია, რომ პრემიერ-მინისტრ ბენიამინ ნეთანიაჰუს თავმჯდომარეობით მოქმედმა ისრაელის უსაფრთხოების კაბინეტმა სამხედროებს ირანზე თავდასხმისთვის მზადების გაძლიერება დაავალა.

საზოგადოებრივი მაუწყებლის, KAN-ის ცნობით, „უსაფრთხოების კაბინეტის მიერ ისრაელის სამხედროებისთვის გაცემულმა მითითებებმა შესაძლოა ისეთი მოქმედებები გამოიწვიოს, რომლებიც ომს გააჩაღებს“.

KAN-ის ცნობით, მითითებები მას შემდეგ გასაჯაროვდა, რაც ისრაელის ოპოზიციის ლიდერმა გადი აიზენკოტმა განცხადება გაავრცელა. მან ნეთანიაჰუს, რომელიც პრემიერ-მინისტრის მოვალეობას დროებით ასრულებს, მოუწოდა, მომდევნო მთავრობის ჩამოყალიბებამდე სამხედროები „პირდაპირი და დაუყოვნებელი საფრთხის გარეშე“ არ განალაგოს.

ისრაელის პრეზიდენტმა იცხაკ ჰერცოგმა აიზენკოტს ახალი მთავრობის ჩამოყალიბება შაბათ-კვირას შესთავაზა. ნეთანიაჰუს მმართველმა კოალიციამ ოქტომბრის არჩევნებში საპარლამენტო უმრავლესობა დაკარგა.

ნეთანიაჰაუ, რომელიც ძალაუფლების დაკარგვის ზღვარზეა, თუ ოპოზიცია მთავრობის ჩამოყალიბებას შეძლებს, მტკიცედ ამტკიცებს, რომ ირანთან ომი თეირანის მთავრობის დამხობამდე გაგრძელდება.

ისრაელის მიერ ირანზე თავდასხმისთვის მზადების შესახებ ცნობები ვრცელდება იმ დროს, როცა მხარეები დიპლომატიურად ცდილობენ შემდგომი კონფლიქტის თავიდან აცილებას და პოლიტიკური გამოსავლის პოვნას.

აშშ-ის პრეზიდენტმა დონალდ ტრამპმა განაცხადა, რომ ომის განახლებისთვის მზადაა, თუ კატარის მიერ შეთავაზებული დიპლომატიური გზა ვაშინგტონსა და თეირანს შორის შეთანხმებას ვერ მოიტანს.

ირანის უსაფრთხოების სამსახურის ხელმძღვანელმა მოჰსენ რეზაიმ სოციალურ ქსელში დაწერა: „თუ აშშ ირანის წინააღმდეგ ომს კვლავ დაიწყებს, აგრესიაში მონაწილე ყველა სამხედრო ბაზა, დასავლეთ აზიიდან ევროპამდე, ირანის სასიკვდილო დარტყმების კანონიერი სამიზნე გახდება“.

რეზაიმ დასძინა: „უსაფრთხო მანძილი არ არსებობს. უსაფრთხო თავშესაფარი არ არსებობს. არავინ არის ხელშეუხებელი“.

ალ ჯაზირას კორესპონდენტმა რესულ სერდარ ატაშმა თეირანიდან განაცხადა, რომ ირანის ხელმძღვანელობა განიხილავს, დანიშნოს თუ არა მკაცრი პოზიციებით ცნობილი რეზაი ქვეყნის ახალ მთავარ მომლაპარაკებლად.

ატაშის თქმით, თეირანში ზოგი ამბობს, რომ თუ არსებული მდგომარეობა დიდხანს გაგრძელდება, ირანი არ დაელოდება და შესაძლოა პრევენციულ მოქმედებაზე გადავიდეს. მან დასძინა, რომ ირანის ამჟამინდელმა მთავარმა მომლაპარაკებელმა, პარლამენტის სპიკერმა მოჰამედ ბაგერ ღალიბაფმა, განაცხადა, რომ მოლაპარაკებების ჩაშლის შემთხვევაში ირანი „მდგრადი შეკავებით“ შეეცდება „არც ომის და არც მშვიდობის“ მდგომარეობიდან გამოსვლას.