ავღანელ ექიმებს ქალების მკურნალობა ეკრძალებათ

ავღანეთში ქალებს, როგორც ჩანს, ექიმთან გასინჯვისას სულ უფრო მეტი პრობლემა ექმნებათ. ამის შესახებ „გარდიანი“ (The Guardian) იუწყება. ექიმებისთვის ქალების მკურნალობის აკრძალვა საჯაროდ არ გამოცხადებულა, თუმცა „გარდიანისა“ და „ზან ტაიმსის“ (Zan Times) მიერ მედიაში გავრცელებულ ცნობებსა და ქალებთან და ექიმებთან ჩატარებულ ინტერვიუებზე დაყრდნობით, ასეთი აკრძალვა, როგორც ჩანს, მთელ ქვეყანაში დამკვიდრდა.

ამ ცნობების თანახმად, ქვეყნის რამდენიმე რეგიონში მამაკაცმა ექიმებმა თალიბანისგან მიიღეს მითითება, რომ ქალი პაციენტები არ გაესინჯათ. ექიმებმა „გარდიანს“ უთხრეს, რომ მათ ქალი პაციენტების გასინჯვისა და გადაუდებელი სამედიცინო დახმარების გაწევის უფლება არ აქვთ. ამის გაკეთება მხოლოდ გარკვეული პირობებით შეიძლება, მაგალითად, თუ პაციენტს თან ახლავს მისი მეურვე მამაკაცი, მაჰრამი, ან თუ კონკრეტულ პროცედურებს ქალი სამედიცინო პერსონალი ატარებს.

2024 წლის დეკემბრიდან ქალებს სამედიცინო სასწავლებლებში სწავლა აეკრძალათ. მას შემდეგ საავადმყოფოებში ექიმებს ქალი თანამშრომლების აყვანაც აღარ შეუძლიათ. ექიმ ქალებს კი თალიბანი ავალდებულებს, რომ მუშაობისას მაჰრამი ახლდეს.

სტომატოლოგებმა გაზეთებს განუცხადეს, რომ ამ წესს თალიბანის უსაფრთხოების ძალები რეიდებით აღასრულებენ. მამაკაც სტომატოლოგებს აფრთხილებენ, რომ დააპატიმრებენ, თუ მათ კაბინეტებში ქალი პაციენტები აღმოჩნდებიან.

ჩრდილოეთ ავღანეთის ბალხის პროვინციაში ვითარება განსაკუთრებით აბსურდული ჩანს. „გარდიანის“ ცნობით, ექიმებს ეკრძალებათ ქალი პაციენტების ნამდვილი სახელებით მოხსენიება. როგორც ამბობენ, იქ ჩინოვნიკებმა საავადმყოფოებს, კერძო სამედიცინო კაბინეტებსა და კლინიკებს დაავალეს, ქალების სახელების ნაცვლად სიტყვა „ბიბი“ გამოიყენონ. ეს სიტყვა უფროსი ასაკის ქალებისადმი პატივისცემით მიმართვის ფორმაა. სამედიცინო რეცეპტებზეც ქალის სახელი კი არა, მხოლოდ „ბიბი“ უნდა ეწეროს.