მოლდოვამ რუსეთზე დამოკიდებულების შესამცირებლად რუმინეთთან ახალი ელექტროგადამცემი ხაზი აამოქმედა

მოლდოვამ ოფიციალურად აამოქმედა ახალი ელექტროგადამცემი ხაზი, რომელიც ქვეყანას მეზობელ რუმინეთთან და ევროპის ელექტროქსელთან აკავშირებს. მისი მიზანი რუსულ ენერგიაზე დამოკიდებულების შემცირებაა.

მოლდოვის პრეზიდენტმა მაია სანდუმ კვირას X-ზე დაწერა: „ათწლეულების განმავლობაში მოსკოვი ენერგიას ჩვენს დასაშანტაჟებლად იყენებდა“.

სანდუმ დასძინა: „აღარასოდეს: მოლდოვა რუსულ გაზს საერთოდ აღარ ყიდულობს“.

მოლდოვა 2,6-მილიონიანი ქვეყანაა, რომელიც რუმინეთსა და უკრაინას შორის მდებარეობს. ქვეყანა გაზის უმეტეს ნაწილს რუსეთისგან, პრომოსკოვური სეპარატისტული რეგიონის, დნესტრისპირეთის გავლით და უკრაინის ტერიტორიაზე გამავალი მილსადენებით იღებდა.

სანდუმ კვირას, კიშინიოვში, ელექტროგადამცემი ხაზის გახსნის ცერემონიაზე განაცხადა: „ამ პროექტის წყალობით, ვაძლიერებთ ელექტროენერგიის გადაცემის შესაძლებლობას, ვამრავალფეროვნებთ მომარაგების წყაროებს და მოლდოვის რესპუბლიკას ევროპის ენერგოსისტემასთან უფრო მჭიდროდ ვაკავშირებთ“.

სანდუმ ისიც თქვა, რომ რუმინეთთან კიდევ ორი ელექტროგადამცემი ხაზი იგეგმება.

ცერემონიას ესწრებოდა ენერგეტიკის საკითხებში ევროკომისარი მარტა კოსი. მისი თქმით, მოლდოვას ახლა შეუძლია, ენერგია იქ იყიდოს, სადაც ყველაზე იაფია.

400-კილოვატიანი, ზემაღალი ძაბვის ხაზი ქალაქ ვულკანეშტიდან კიშინიოვამდე გადის. მისი ამოქმედება მოლდოვას დნესტრისპირეთში მდებარე კუჩურგანის თბოელექტროსადგურზე დამოკიდებულების შემცირების საშუალებას აძლევს.

სანდუმ განაცხადა: „ყოველ ჯერზე, როცა მოლდოვა გაბედავს, მოსკოვის სურვილისგან განსხვავებული არჩევანი გააკეთოს, ისინი ელექტროენერგიის შეწყვეტით გვემუქრებიან“.

„ენერგოდამოუკიდებლობის ხაზად“ წოდებული ელექტროგადამცემი ქსელი მოლდოვის ხელისუფლების მიერ თავდაპირველად დაპირებულ თარიღზე ორი წლით გვიან ამოქმედდა.

გასულ თვეში მოლდოვის პარლამენტმა დაამტკიცა მთავრობის მოთხოვნა, ქვეყანაში საგანგებო მდგომარეობა 20 ნოემბრამდე გაგრძელებულიყო. ამ გზით მთავრობა გაზის დეფიციტის შემსუბუქებას ცდილობს, მსოფლიო ბაზარზე გაზის ფასების მკვეთრი ზრდის ფონზე.

ევროპაში ზოგიერთი ქვეყანა გაზის ფასების მკვეთრ ზრდაში მოსკოვს ადანაშაულებს და აცხადებს, რომ მან კონტინენტზე ზეწოლის მიზნით დამატებითი მიწოდება შეაჩერა.

შავი ზღვის რეგიონში ევროპასთან დაახლოებული ქვეყნები ამბობენ, რომ კვლავ განიცდიან რუსეთის მიერ, სავარაუდოდ, განხორციელებულ თავდასხმებს.