ისრაელი და მაროკო საელჩოების გახსნაზე შეთანხმდნენ

ისრაელი და მაროკო საელჩოების გახსნაზე ოთხშაბათს, ნიუ-იორკში გამართული შეხვედრის შემდეგ შეთანხმდნენ. შეხვედრას ორი ქვეყნის საგარეო საქმეთა მინისტრები და გაეროში აშშ-ის ელჩი ესწრებოდნენ.

ქვეყნებმა ურთიერთობები 2020 წელს, აშშ-ის ინიციატივით დადებული აბრაამის შეთანხმებების ფარგლებში დაამყარეს. ამ შეთანხმებების საფუძველზე რამდენიმე არაბულმა სახელმწიფომ ისრაელთან ურთიერთობები მოაწესრიგა.

ისრაელის საგარეო საქმეთა სამინისტროს განცხადების თანახმად, შეხვედრაზე ისრაელმა და მაროკომ რამდენიმე ზომის მიმართ ერთგულება დაადასტურეს. მათ შორისაა „ორ ქვეყანას შორის დიპლომატიური ურთიერთობების გაღრმავება, შესაბამისი დიპლომატიური მისიების საელჩოების დონემდე ამაღლება და ელჩების დანიშვნა“.

სამივე ქვეყნის სახელით გაეროში აშშ-ის მისიამ ერთობლივი განცხადება გაავრცელა. განცხადებაში ნათქვამია: „მაროკოსა და ისრაელს შორის სრული დიპლომატიური, მშვიდობიანი და მეგობრული ურთიერთობების დამყარება ორივე ქვეყნის საერთო ინტერესშია და მშვიდობის საქმეს ხელს შეუწყობს“.

განცხადებებში საელჩოების გახსნის ვადები მითითებული არ ყოფილა. ისრაელმა მსგავსი განცხადება მანამდე, 2022 წლის ივნისშიც გააკეთა. მაშინ მაროკოს იმჟამინდელი საგარეო საქმეთა მინისტრი იაირ ლაპიდი ეწვია.

ოთხშაბათის შეხვედრის შემდეგ ორმა ქვეყანამ ასევე განაცხადა, რომ წლის ბოლომდე რამდენიმე ეკონომიკურ შეთანხმებას გააფორმებს. ისრაელის განცხადებაში ნათქვამია: „მომდევნო თვეებში ორ ქვეყანას შორის მაღალი დონის ორმხრივი ვიზიტები გაიმართება“.