ისრაელის ავიაიერიშმა ღაზაში სულ მცირე ხუთი ადამიანი იმსხვერპლა

ალ-ჯაზირას (Al Jazeera) კორესპონდენტმა ჰანი ალ-შაერმა, რომელიც ხან-იუნისიდან იტყობინება, განაცხადა, რომ შაბათს, გამთენიისას, რემალის უბანში მდებარე ალ-ასალას შენობას გაფრთხილების გარეშე დაარტყეს.

რემალი ღაზის ქალაქის ერთ-ერთი ყველაზე მჭიდროდ დასახლებული საცხოვრებელი უბანია. იქ ათასობით იძულებით გადაადგილებული ადამიანი მთელ უბანში მოწყობილ დროებით ბანაკებში აფარებს თავს.

ალ-შაერის თქმით, თავდასხმა შუაღამისას მოხდა, როცა მოსახლეობას ეძინა.

მან თქვა: „გავიგონეთ, როგორ ძლიერდებოდა გამანადგურებლების ხმა. შემდეგ სამი დარტყმა განხორციელდა, რომლებმაც ბინა დააზიანა და შიგნით მყოფი ადამიანები იმსხვერპლა“.

დარტყმამ სამიზნე ბინა გახვრიტა და ქვედა სართულებიც გაარღვია, რამაც მრავალსართულიან შენობაში დამატებითი ნგრევა გამოიწვია.

ხანძარი სულ მცირე ერთი საათის განმავლობაში მძვინვარებდა, ვიდრე პალესტინის სამოქალაქო თავდაცვის ჯგუფებმა მისი ჩაქრობა შეძლეს.

ალ-შაერმა ადგილზე არსებული ვითარება „შემზარავად“ აღწერა. ადამიანებს, რომლებსაც ეძინათ, ნანგრევები დაეყარა.

ალ-შაერის თქმით, სამოქალაქო თავდაცვის ჯგუფები ადგილზე დაკარგულ ადამიანებსა და ცხედრებს კვლავ ეძებდნენ. ამ დროს ისრაელის დრონები ტერიტორიის თავზე ფრენას განაგრძობდნენ, ხოლო ღაზის თავზე დაბალ სიმაღლეზე მფრინავი გამანადგურებლების ხმა ისმოდა.

ალ-შიფას საავადმყოფოს ცნობით, დაღუპულთა შორის ოთხი ქალი იყო, მათ შორის ხანდაზმული ქრისტიანი ქალი და მისი ქალიშვილი.

ექვსი დაჭრილი სამკურნალოდ ალ-შიფას საავადმყოფოში გადაიყვანეს.