ისრაელის მინისტრი „ნაზას“ რეჟისორებისთვის მოქალაქეობის ჩამორთმევას ითხოვს

„ნაზამ“ შაბათს ვენეციის კინოფესტივალზე ჟიურის სპეციალური პრიზი მიიღო. ვენეციაში პრემიერაზე დოკუმენტურ ფილმს მაყურებელი 25 წუთის განმავლობაში ფეხზე წამომდგარი უკრავდა ტაშს. კრიტიკოსებმაც ფილმი მაღალი შეფასებით მიიღეს. „ნაზაში“ ისრაელის სამხედრო და სადაზვერვო უწყებების წარმომადგენლები ანონიმურად ჰყვებიან, როგორ ხოცავდა ისრაელის არმია ღაზაში პალესტინელ მშვიდობიან მოსახლეობას.

ისრაელის ულტრამემარჯვენე ეროვნული უსაფრთხოების მინისტრი იტამარ ბენ-გვირიც ორ კინორეჟისორს მკაცრად დაესხა თავს. მან X-ზე დაწერა: „თქვენ ისრაელის მთელი ხალხის სირცხვილი და თავის მოჭრა ხართ. დაიკარგეთ!“

ისრაელში მოქალაქეობის ჩამორთმევა კანონით შესაძლებელია, თუმცა ამ ზომას იშვიათად იყენებენ. უზენაესმა სასამართლომ 2022 წელს დაადასტურა, რომ ასეთი ნაბიჯი შესაძლებელია, თუ ბრალდებულებმა ჯაშუშობით ან ღალატით სახელმწიფოს მიმართ „ერთგულება“ დაარღვიეს. 2023 წელს შესაბამისი კანონი „ტერორისტულ“ დანაშაულებზეც გავრცელდა. მოქალაქეობის ჩამორთმევა შინაგან საქმეთა მინისტრმა უნდა მოითხოვოს, იუსტიციის მინისტრმა დაამტკიცოს და საბოლოოდ მოსამართლემ დაადასტუროს.

ისრაელის არმიამ პარასკევს უარყო დოკუმენტურ ფილმში გამოთქმული ბრალდებები, რომლებიც ხელოვნური ინტელექტის დახმარებით ჰამასის სავარაუდო მხარდამჭერების მასობრივ მკვლელობას ეხებოდა. არმიის განმარტებით, დოკუმენტური ფილმი ინფორმატორებს ეყრდნობა, რომელთა ვინაობის „გადამოწმებაც“ შეუძლებელია.

ისლამისტურმა ჰამასმა და მისმა მოკავშირეებმა 2023 წლის 7 ოქტომბერს ისრაელზე მასშტაბური თავდასხმისას 1 200-ზე მეტი ადამიანი მოკლეს. მათ 251 ადამიანი მძევლად ღაზაში წაიყვანეს. ისრაელმა ღაზაში მასშტაბური თავდასხმებით უპასუხა. ჰამასის მიერ კონტროლირებული ჯანდაცვის სამინისტროს მონაცემებით, ამ თავდასხმების შედეგად 73 000-ზე მეტი ადამიანი დაიღუპა.