უკრაინამ რუსეთზე იერიში მიიტანა, დრონის ნამსხვრევები მატარებელს მოხვდა

გუსევის თქმით, მატარებელი ვორონეჟის გარეუბანში მოძრაობდა, როცა მას ჩამოგდებული დრონის ნამსხვრევები დაეცა. რუსეთის რკინიგზის კომპანიამ (РЖД) განაცხადა, რომ დაზიანდა მე-11 მატარებლის ვაგონი. მატარებელი შავი ზღვის სანაპიროზე მდებარე ანაპიდან მოსკოვისკენ მიემართებოდა. შეტევების გამო ოლქში მატარებლების მოძრაობა დროებით შეჩერდა.

გუბერნატორ გუსევის თქმით, ვორონეჟზე შეტევის დროს ასევე დაიწვა ბიზნესცენტრი. დაზიანდა სამრეწველო ობიექტები, საცხოვრებელი სახლი და სკოლის სპორტული მოედანი. ქალაქის თითქმის ყველა ნაწილში დაზიანდა ფასადები და ფანჯრები. თავად ვორონეჟსა და ოლქში სულ 113 დრონი ჩამოაგდეს.

თუმცა, უკრაინულმა დრონებისა და რაკეტების მწარმოებელმა კომპანია ფაირ პოინტმა (Fire Point) ორშაბათს განაცხადა, რომ უკრაინამ რუსეთის ქალაქ ვორონეჟში სინთეზური კაუჩუკისა და პოლიმერების დიდი ქარხანა დაბომბა.

უკრაინა დასავლეთის დახმარებით ოთხ წელზე მეტია, რაც რუსეთის აგრესიას ებრძვის. თავდაცვისას უკრაინა რუსეთის სიღრმეში მდებარე ობიექტებსაც არაერთხელ უტევს.

ამასობაში, ვოლოდიმირ ზელენსკის ცნობით, აშშ-ის გაფრთხილებები რუსეთის მოსალოდნელი ბალისტიკური სარაკეტო დარტყმების შესახებ კვლავ სრულად გადაიცემა. ეს გაფრთხილებები უკრაინის საჰაერო თავდაცვისთვის გადამწყვეტია.

უკრაინულ ტელეარხ ტი-ეს-ენთან (TSN) საუბრისას ზელენსკიმ თქვა, რომ SpaceX-ის თანამგზავრული ინტერნეტი სტარშილდიც (Starshield) დილიდან კვლავ მუშაობს. კავშირი რამდენიმე დღის წინ შეიზღუდა, თუმცა ახლა აღდგენილია, მათ შორის საათში 420 კილომეტრამდე სიჩქარით მოძრავი ობიექტებისთვისაც.

ამასთან, ზელენსკიმ გამოთქვა მზადყოფნა რუსეთთან და აშშ-სთან მოლაპარაკებებისთვის, რომლებიც ნოემბერში უნდა გამართულიყო.

„მოლაპარაკებებისთვის მზად ვართ“, თქვა ზელენსკიმ კვირას უკრაინის ტელევიზიით. მისი თქმით, ტერიტორიული საკითხები სახელმწიფოთა და მთავრობათა მეთაურების დონეზე უნდა განიხილონ, სხვა თემებზე კი ტექნიკურმა სამუშაო ჯგუფებმა შეიძლება იმსჯელონ. „ამ ყველაფრის განხილვა ნოემბერში შეიძლება“, თქვა მან.

კრემლმა პარასკევს განაცხადა, რომ ნოემბრის პირველ ნახევარში აბუ-დაბიში აშშ-ის შუამავლობით რუსეთისა და უკრაინის მომლაპარაკებლების პირდაპირი შეხვედრები იგეგმება. ეს განცხადებები აშშ-ის მთავრობის ახალი დიპლომატიური მცდელობების ფონზე გაკეთდა.