Joby-ს ავტონომიურმა თვითმფრინავმა აშშ გადაკვეთა

Joby-ს ამ ჩვენებით საკუთარი ტექნოლოგიის შესაძლებლობების დამტკიცება სურდა. ამ ტექნოლოგიით ჩვეულებრივი, ფრენისთვის სერტიფიცირებული თვითმფრინავების აღჭურვაა შესაძლებელი. კომპანიის განცხადებით, ამით მან „ავტონომიური საჰაერო ლოგისტიკის მასშტაბირებადი გზა“ შექმნა. აშშ-ის თავზე თვითმფრინავი გადატვირთულ საჰაერო სივრცეშიც შეუფერხებლად გადაადგილდა და უამინდობას გვერდი აუარა. Joby Aviation-ის დამფუძნებელმა და აღმასრულებელმა დირექტორმა ჯობინ ბევირტმა აღნიშნა, რომ მოგზაურობამ „ავიაციის ახალი ეპოქა წარმოაჩინა“. მისი თქმით, ამ ეპოქაში ავტონომიურობას მნიშვნელოვანი როლი ექნება. ის შორეული დასახლებების დაკავშირებასა და მნიშვნელოვანი ტვირთის მიწოდებას გააადვილებს. ასევე შესაძლებელი გახდება კატასტროფებზე უფრო სწრაფი რეაგირება და მფრინავების დაცვა.

Joby აქამდე ძირითადად თავისი საჰაერო ტაქსებით იყო ცნობილი. ეს მგზავრების გადასაყვანად განკუთვნილი მულტიკოპტერებია. აშშ-ის კომპანია, სხვა პროექტებთან ერთად, მსოფლიოში პირველი კომერციული ვერტიპორტის შექმნაში მონაწილეობს. დუბაიში მდებარე ეს ობიექტი მგზავრებისა და ტვირთის გადასატანად აფრენისა და დაშვების ადგილია. აშშ-ში Joby რეალურ პირობებში საჰაერო ტაქსების მასშტაბურ გამოცდაში მონაწილეობს. ლონდონსა და სამხრეთ ინგლისში კომპანია ბრიტანულ ავიაკომპანია Virgin Atlantic-თან ერთად საჰაერო ტაქსების ქსელზე მუშაობს. ამ ტაქსებს 300 კმ/სთ-მდე სიჩქარის განვითარება და 240 კმ-ის დაფარვა შეუძლიათ.